Royal Caribbean Voyager of the Sea -兩公婆Get Away Cruise Trip (Day 1)

難得兩公婆去二人世界，本身都諗住去澳門，但去過好幾次又唔係有新野想試，所以就試下cruise trip，可以順便當做資料搜集為下次全家出遊作準備!

今次join左海洋航空者號3日2夜全公海之旅，純玩船上設施。星期五出發，1點半已經可以上船。我地大概2點零就入去啦！

由於上船時間有幾個鐘，人流都算分得幾散，好快就過到關上到船。

上到去第一件事當然係拎房，我地揀左海景房(6樓)。由於我上一次上船(大概有10年前上麗星)嘅住房經驗太差(上次係公司包船但我抽到最細嘅內艙房T.T), 所以本身對間房係零期望。今次間房係船頭位置，仲要屈入條巷仔度，心諗今次又出事? 一開門入到去，好，驚，喜，呀！有圖有真相! 感覺仲闊過隔離嘅4人家庭所。

放低野之後，本來諗住去12樓問下個spa之後去游水，問完先知原來今日做spa package 會送多25分鐘，本身鍾意按摩嘅我地就即時book埋3點半嘅spa....

做spa之前我地去左11樓嘅泳池行個圈。 呢架船啲游泳池分得比較散，有四小個，所以每一個嚟講呢對大人都唔係太夠大，不過for小朋友玩下其實係唔錯，因為小朋友應該會興奮咁呢個池試下嗰個又試下。另外我都幾鐘意佢可以借埋唔同size嘅救生衣比小朋友，著住落水大人就冇咁驚。除咗游泳池之外，呢一層呢亦都有好幾個按摩池，呢啲按摩池係24小時開放嘅，所以無時無刻都會有人喺度浸。

話咁快就夠鐘做Spa，我哋揀咗75分鐘嘅package 咁另外再加埋佢送嗰25分鐘。感覺係如果有太多時間唔知做乜又想輕鬆下都可以試下。以佢收緊Mira Spa嘅大概8折價錢（100分鐘價錢係USD200 -連18% service charge，Mira大概係hkd1000一個鐘但包埋unlimited sauna），我會覺得啲細節可以做得好啲: 首先喺客人等緊嘅時候可以沖番杯茶，香薰油嘅選擇可以多啲，按緊嘅時候可以播番啲音樂，裝修亦可以稍作翻新等。按摩嘅手勢我就覺得可以接受，但因為欠缺頭先講嘅配套，同始終按緊嘅時候不停都聽到架船有啲e e 聲，其實都會影響到想放鬆嘅心情，除非好攰好攰啦如果唔係都未必係好值得encore。(按完攪到我好想去Mira Spa...)

之後就係全船compulsory 嘅演習。

解散後就夠鐘食飯啦! 全船人預先比安排分兩段時間食飯，我地係頭圍(第一日食6點半)，於是差不多時間係我哋就去咗3樓嘅主餐廳- Sapphire Dinning Room 享用我地嘅第一餐。呢個船嘅免費餐廳有三間，第一間係我哋而家去緊嘅主餐廳位於船嘅3/4/5樓嘅Sapphire Dining Room， 設計係有啲似Titanic 裡面嘅ball room。呢個係以點餐形式，每餐會有特定餐牌，由appetizer，main course，到甜品餐茶。另一間就係11樓比較casual嘅自助餐，選擇都幾多。第三間就係位於五樓皇家大道上類似小食亭，主要serve茶啡甜品同包點。

講返我哋第一晚嘅dinner，真係好，多，人，呀! 我老公首先去餐廳度攞位，到我10分鐘後去到嘅時候，已經見到有人喺門口等位，當我打開門就見到老公坐喺最近門口嘅第一張枱。食物選擇算係ok，前菜同主菜各有6/7 款，服務都ok 。至於野食質素就見仁見智，真心講食物嘅真身同圖片係有少少距離。 食到差唔多尾聲嘅時候，有個類似經理嘅人攞住其他要charge 嘅餐牌問我哋有冇興趣訂位。由於畀第一晚嘅墟撼情景嚇親，我哋就決定book另一間意大利餐廳作為第二日嘅午餐，盛惠15蚊美金一位，咁就可以食得舒服啲。

 

食完飯之後，又繼續我哋郵輪探索之旅。我哋首先去咗12樓嘅甲板欣賞下當晚嘅夜景同嗰個好靚嘅月亮。

之後呢我哋就去咗做一件我哋好多年冇做過嘅事，就係打乒乓波!

 兩公婆唔使睇仔嘅時候，其實都真係有好多嘢可以玩嘢! 玩左陣就夠鐘去睇第一晚嘅opening show- Aussie Boys!

去到位於 3樓嘅珊瑚大劇院，我哋揀咗最有理嘅位置啫(即control panel後面)。 今晚唔full house，可能因為三個澳洲小鮮肉唱歌跳舞未必啱啲老人家或者係好細個嘅小朋友。但真心講，雖然啲歌係大部份都唔識嘅，但係不能否認係佢三個真係唱得幾好，氣氛亦搞得好好，而佢哋三個都好有心地練咗幾隻國語表演。

睇完個數就返到頭先路過嘅迷你賭場。呢一架船同之前啲麗星郵輪最唔同嘅地方就係佢係主要sell家庭客，所以個casino 真係好細，只係得半層，感覺都唔係好烏煙瘴氣。今晚有一張房卡會送五蚊美金嘅泥馬用黎玩老虎機。

老公主力玩blackjack，因為我哋發覺除左大細枱之外，其他全部我地都唔識玩呀哈哈... 經過咗驚心動魄嘅20分鐘後，最後我哋係冇輸贏，成功全身而退。跟住我地攞住嗰十蚊美金泥馬去咗玩老虎機，諗住好簡單嘅老虎機，結果我地兩公婆坐到埋去都未搞清楚究竟係點樣玩，已經差唔多使輸曬! 所以到呢家嘢真係好吊詭...

諗瞓前諗住上去11樓自助餐食個宵夜(因為頭先個dinner 真係一般...)，但我發覺原來有好多人同我地一樣咁肚餓，個自助餐真係人山人海，水泄不通呀…我地好快食啲野，之後就返嗰個令我哋覺得好滿意嘅房間過電郵輪上嘅第一晚。