麥理浩夫人渡假村1行10人兩日一夜之旅 (Day 2)
行程嘅第二朝，尋晚實在瞓得太差，因為同細佬意同一張床（怕佢碌落地），佢成日晚好似洗衣機裏面嘅衫一樣，不停自轉 ...喺全晚不斷 受拳打腳踢之下，我呢個阿媽一早起身就好似一條喪屍咁。但冇辦法啦，營地嘅早餐係由八點鐘供應到八點八， 更重要嘅係，營舍嘅冷氣早上八點就會熄機，所以再攰，七點九我都要 爬起身。
第二日嘅時間係比較趕嘅，宿營嘅活動時間係由九點鐘至十一點鐘 ，所以一啲精力較旺盛嘅小朋友，而又唔趕時間嘅話，我會建議大家book埋之後嘅日營，咁你就可以玩埋11點至三點半喝呢段時間 。
食完早餐大概係八點九，營地活動未開始，所以我哋成班去咗旁邊嘅遊樂場舒展下筋骨，大人細路都啱玩。
之後我哋去咗一啲室內運動場，途經射箭，繩網陣同埋攀石區，呢啲都係畀大啲嘅小朋友玩。
最後我哋喺壁球室玩咗一輪，雖然壁球對於幾歲嘅小朋友都係太難，但唔緊要，同小朋友一齊玩嘅好處，就係你總會諗到一啲其他啱玩嘅方法同佢哋玩餐飽。
之後我哋再一次兵分兩路，因為家姐心想再去做手工 ，而細佬意就去咗尋日喺康樂館裏面嘅playroom。今次手工藝室嘅主題係穿珠，大家可以睇下我哋嘅製成品:
時間過得好快，穿珠之我哋都係時間返房執拾細軟。
最後落到去飯堂交低鎖匙，食埋個午餐，我哋就搭佢嘅shuttle bus離開。同場加映呢個午餐嘅菜式，一睇就知邊啲係加餸...
總結兩日一夜嘅行程，其實以扶老攜幼嚟講都算過得充實。當然如果小朋友大啲，細嗰個都有4/5歲，咁就可以再玩得再多啲。尤其是係第二日本身我哋有報日營，但係考慮到大家嘅體力同裝備，我哋冇留底繼續玩。
另外搭返shuttle bus出嚟，落車地點都係西貢鄧肇堅運動場。出到去如果有興致有體力嘅，可以再喺西貢市中心玩一陣，夜晚食埋個海鮮餐，咁呢兩日一夜會過得更加完滿。
費用方面，同我係之前去鯉魚門度假村差唔多。人頭費大概係五六十蚊，小朋友同埋長者半價，兩歲以下免費。另外食嘢大概係二三十蚊一餐。 雖然營餐質素麻麻地，但真獨市生意，尤其喺麥理浩夫人度假村係叫唔到的士去消夜，所以一係就自己有帶定零食，一係就幫襯佢加餸啦！
留言
張貼留言