鯉魚門渡假村兩日一夜之旅 （Day 1）

Day 1

因為平日要返工嘅關係，成日都覺得同小朋友少咗啲親子時間。所以趁住復活節可以攞到兩日annual leave 就試下book咗鯉魚門渡假村兩日一夜宿營。相信去過鯉魚門渡假村嘅朋友都知道，鯉魚門渡假村嘅地勢係有小小陡峭嘅。住宿嘅地方喺山頂，如果要活動呢係要落去山腰或山腳，到食飯/騎馬係要落去另一邊山腳。所以去呢個渡假營玩都對體力有一定要求。由於淨係得我一個放假嘅關係，所以今次淨係同家姐心一個去住先，下次再同細佬意去。以下係家姐心出發前嘅準備圖...

17號嘅晏晝，一個風和日麗嘅日子，我哋同埋家姐心嘅一個同學同埋佢媽咪一齊出發去鯉魚門渡假村。

我地大概兩點零鐘到達村口。我地首先拎左鎖匙，擺低我哋嘅行李上去位於山頂嘅房間之後，終於可以落山進行我哋第一個活動-兒童繩網。

家姐心同同學仔好似馬騮咁玩完一輪之後，就頂唔順頂轉去左旁邊一個比較靜態少少嘅活動-做手工。做手工嘅活動室喺主要活動大樓地下嘅冷氣房，每節時段大概20分鐘左右，會有個工作人員會教小朋友做啲簡單嘅手工。我哋當日做嘅係蝴蝶。

做完手工之後一小朋友就蠢蠢欲動想再活動下。 但由於烈日當空嘅關係，我哋就去咗隔離嘅室內舞蹈室同老師一齊跳舞。咁但係，呢度導師主要係教一啲類似大媽舞嘅風
格嘅，所以小朋友都未必識欣賞。 好彩今次都冇其他人喺個舞蹈室裏面，所以導師都由得佢地播住學校啲歌自己有自己跳，跳得好開心。

跳完舞一出去戶外，就見到我地嘅童年回憶- 跳飛機！所以我呢個貪玩嘅媽咪當然捉住佢兩個小朋友一齊跳。

跳完一輪，我地就轉戰位於舊咖啡閣對出嘅一個遊樂場。呢個遊樂場就同我哋一般係屋企附近見到嗰啲差唔多樣，但係因為有兩個小朋友一齊玩嘅關係，淨係你追我逐，瀡下滑梯都覺得非常之高興。

上上落落玩咗一輪之後，差唔多6點夠鐘食飯啦 ！所以我哋就慢慢碌番落去山腳嘅飯堂準備食晚餐。至於度假村嘅嘢食啦喎...叫做食飽肚痛就算啦...

匆匆食完飯之後，兩個小朋友當然係意猶未盡繼續玩！但由於天開始黑，怕餵蚊，於是我哋就再由山腳行返上去山腰，去到主要活動大樓對面有一個兒童嘅室內遊戲屋。 呢座遊戲屋呢係由三間房組成，兩間細少少嘅房有大量煮飯仔用品同積木，大房裡面有滑梯同其他大件啲積木。連埋其他小朋友一齊玩眨下眼又消磨左個幾兩個鐘。

開心嘅時間過得好快，同學仔要番屋企啦（因為佢地本身無諗住過夜），而我地都要番房執下野沖涼準備休息。

講返房間本身，我哋訂咗一間四人房 。房間好簡單，有四張床同埋一個衣櫃同一張枱加兩張凳。因為我地得兩個人所以我同家姐心就好開心咁樣將4張床拍埋一齊。 家姐心果然開始大個女啦，又幫手鋪床同入枕頭袋啦。當然佢最興奮嘅時間就係拍埋啲床之後喺上面碌嚟碌去啦！

沖涼嘅地方係喺房間嘅外面嘅因為佢哋係三間房間share一個廁所同埋一個沖涼嘅地方。除咗廁所同埋沖涼，亦都有一個共用嘅pantry仔。我同家姐心沖完涼之後就好快上咗床上面，講下今日我哋玩嗰啲咩，又攞啲故仔書出嚟講下。可能玩得太攰嘅關係，家姐心好快啲瞓到 扯鼻鼾。望住我個寶貝女，其實媽媽真係想多啲時間陪你...