心愛芭蕾舞
認識家姐心嘅朋友都知道，佢細細個已經跳跳紮同鍾意跟音樂跳舞，加上老公有個朋友開跳舞學校，我哋喺拍拖嗰陣已經睇過佢學校嘅Dance Show (小朋友扮小蜜蜂真係好得意!)，所以喺家姐心歲半就開始畀佢試下跳芭蕾舞。
當時一開始學就係喺老公朋友喺灣仔嘅 Isla school of dance度學。我覺得Isla 好有心機教之餘亦訓練到孩子有規矩有秩序，所以啲小朋友好鍾意佢同時亦都好聽佢話。我都介紹咗好多個住喺港島嘅朋友去學。
Isla本身好鼓勵小朋友跳多啲，所以當時係一個月費，任上啱level嘅堂。我當時應該係HKD1100一個月，每星期上三堂 （貪小便宜的阿媽...）。以下係家姐心上左一個月之後嘅一次觀課:
但由於我哋住九龍+逢星期六嘅PSL班係早上九點鐘開始+細佬意出世，我哋就冇辦法唯有轉返去比較近屋企嘅地方繼續學跳舞。之後我哋就去咗屋企附近s字頭嘅跳舞學校啦。我地只係維持左大半年時間，純粹個人喜好啦，我就麻麻哋呢一間。因為S字頭嗰間地方太細太窄，小朋友跳完舞出嚟根本上係冇位置畀小朋友換衫；另外佢哋放學嘅時候，係由得啲小朋友就咁行出課室，甚至個鋪，雖然我明白佢地無義務幫我睇住小朋友，但係我覺得基本安全一定要有，最起碼要肯定屋企人嚟左先放小朋友出去。我真心覺得如果有個心懷不軌嘅人行去門口係可以好輕易咁接走去我小朋友...
Anyway, 好彩嗰陣時屋企附近開咗Karen Leung , 導師比較和藹可親之餘，環境好少少同最重要顧及到安全問題。 開始學之後我同家姐心傾計，覺得佢都係比較鍾意喺呢一間嘅。因為佢會喺屋企話返畀我聽佢學咗啲咩，玩左啲咩。
呢個係去完考試之後嘅開心樣~
另外，家姐心學跳舞亦畀我發現到一件事，雖然佢鍾意跳舞但係佢係唔鍾意表演 ，可能都係有啲藝術家性格，呢樣嘢係冇得逼嘅(雖然作為阿媽嘅我好想睇佢表演)...唔緊要啦，都係要順其自然，最緊要佢覺得開心舒服...放鬆啲啦媽咪!
呢個係家姐心第一次表演前嘅相，最後係喊到收唔到聲...😞
留言
張貼留言