真心Encore Playgroup - Bambino Montessori

家姐出世無耐，我呢個心急媽媽已經諗緊同佢番咩playgroup。從6個月開始，番過baby gym, kindermusik, 幼聯，仲有啲試過一兩次連名都唔記得嗰啲。但咁多個playgroup裡面，只有Bambino Montessori 令我encore- 而家細佬意都開始上緊啦。

Montessori (蒙特梭利)本身係芸芸教學理念嘅其中一個，而我係幾buy嘅。Montessori 主張尊重小朋友嘅獨立性 (即係每個小朋友有自己特色，大人唔應該左右或者指揮佢地做事，反而應該鼓勵小朋友根據自己特性/興趣主動探索；老師/大人都只係facilitator, 協助小朋友認識每件工作嘅操作之後，小朋友應該有自由選擇做邊樣工作，唯一係小朋友做工作要一樣還一樣，做完收拾好先做另一樣。另一個特色係混齡上課，因為Montessori 相信年紀較少嘅小朋友從年紀較大嘅朋輩身上學習會更容易明白，而年紀較大嘅小朋友喺教導年紀較少嘅朋輩時，溝通同表達能力亦會有所提升。而Bambino Montessori 有一樣我亦都好鍾意嘅係，就係家長唔需要一齊上堂。一來可以比小朋友喺無爸爸媽媽騷擾嘅情況下盡情學習（因為慣性地爸爸媽媽會好想幫小朋友去完成一件事，而忘記左其實對小朋友嚟講，過程更為重要)，二來當係比自己有個小小嘅break.

家姐心一開始係14個月啱啱識行就上Bambino. Schedule係一星期上連續三日，主要係想令小朋友快啲習慣Montessori 教學模式。課室內所有擺設都係小朋友size, 每次家姐心去到第一件事就係洗手，跟住就可以揀自己有興趣嘅工作。工作嘅種類非常多元化，由簡單屋企都可能有嘅砌積木， 畫畫，用匙羹練習運送波子，放大鏡，用兒童筷子夾野食，到水工作，用兒童刀切食物等不下二十個工作，主要訓練小朋友專注力，守秩序（雖然老師會比小朋友自己揀工作，但小朋友要跟番工作嘅規定嚟做，做完亦要執好，推凳，再放回原位先可以進行下一項工作）同小肌肉。

課室內最多有8-10個學生，老師有3-4個。原本我覺得呢度學嘅野有啲抽象，加上學費都唔平（最新係hkd4300一個月），都有放棄嘅念頭，但老公制止左我。原因係當佢睇番Bambino啲相（佢地會定期整CD比我地），先發覺原來家姐心"忽然"識左嘅日常動作/詞彙，同比較好嘅小肌肉協調，都係多得Bambino 教嘅，我會覺得連in PN 都有啲幫助（講真PN可以考嘅範圍亦都唔係咁多）所以最後家姐心都係到PN差不多開學先停，而細佬意亦都喺15個月大就開始上啦！