由一條馬尾開始...

識得我夠耐嘅朋友都知其實我係天生攣頭髮。 攣嘅程度係，如果我唔整負離子會變咗麥當勞叔叔咁樣...

話說我啲頭髮係小學先開始變成咁，所以當我仲係幼稚園嘅時候，我都係可以紮辮番學，而細細個最記得嘅就係我媽咪幫我紮孖辮嘅日子。到而家有咗家姐心，其中一樣我最鍾意同佢做嘅就係幫佢梳頭同埋紮辮，感覺呢個係我同佢其中一個最親密嘅時候。

雖然我資質有限，學極都唔識一啲比較復雜嘅髮型，唔緊要，正如我成日同家姐心講，"練習多啲，一定得!"

由紮一條馬尾開始，記住同珍惜同個女嘅親密時光。希望阿女將來睇番呢個blog都會懷念我幫佢扎頭髮嘅日子。