麥理浩夫人渡假村1行10人兩日一夜之旅 (Day 1)
話說復活節同家姐心去左鯉魚門渡假村覺得好好玩，今次暑假就同埋公公婆婆姨婆工人連自己一家四口試下呢個自己應該有廿年無嚟過玩嘅麥理浩夫人渡假村。由於係暑假呢個黃金檔期，三個月之前就要同人鬥快打電話去訂位 (康體通真人接聽電話:2927 8080)，成功之後去任何體育館交錢就得。除暑假外, 其他時間都唔會太Full, 尤其如果想試下先唔想過夜，日營+黃昏營係一個唔錯又無咁多人嘅選擇。
麥理浩夫人度假村位於西貢北潭西貢郊野公園，由於喺自然保護區裡面，所以要拎禁區紙先可以入去。我地人多，最方便嘅方法都係去西貢鄧肇堅運動場等免費接駁巴士。呢架巴士喺訂營嘅時候已經Tick 埋，之後喺入營前大概兩個星期會寄資料同提你上巴士時間。
我地上車時間係1:30PM， 所以朝早先開始執拾行李。循例都會同家姐心傾下要有帶的啲乜嘢，以下我哋以下係我哋嘅手繪packing list。
復活節嗰次我地都有畫packing list, 但3個月後嘅家姐心明顯地肯主動啲同諗得深入啲（例如唔係淨係識帶玩具）。見住小朋友嘅進步係做人父母最大成就感!
復活節嗰次我地都有畫packing list, 但3個月後嘅家姐心明顯地肯主動啲同諗得深入啲（例如唔係淨係識帶玩具）。見住小朋友嘅進步係做人父母最大成就感!
我哋執完嘢之後，其實我哋都有啲嚇親因為原來三個人（兩公婆加工人）帶住兩個小朋友去一個兩日一夜嘅camp 嘅行李量同我哋兩公婆夏天去一趟歐洲係差唔多...
正式出發啦！家姐心同細佬意都異常興奮!
去到指定嘅集合地方-西貢鄧肇堅運動場門口，
早咗十零分鐘，小朋友又可以玩到癲。
早咗十零分鐘，小朋友又可以玩到癲。
喺鄧肇堅運動場等shuttle時有少少擔心，因為仲係有啲雨，上車嘅時候都係要擔遮，好彩上咗車後沿途見到天開始清同有少量嘅太陽，心情都好返啲。成程車去到渡假村嘅時間大概係四個字左右，shuttle bus喺正飯堂同辦公室嘅門口停低。落車之後，所有人會入飯堂等briefing 同埋攞門匙。
臨走之前記得影底門前個board，會話你知今日有咩設施有開。
臨走之前記得影底門前個board，會話你知今日有咩設施有開。
我哋今次分派到係四間三人房，房嘅位置都算係山頂。聽到山頂都有少少驚，因為之前去過鯉魚門渡假村，住山頂係真係行到腳震，所以都係懷住戰戰兢兢嘅心情睇下今次嘅山頂係有幾咁挑戰極限。 Surprisingly 都只係由飯堂（山腰位置）行左大概係十分鐘嘅就到，唔算係太辛苦嘅斜路，沿途風景亦十分心曠神怡。
本來對房間係無期望，但打開門入到去感覺可以用驚喜兩個字形容! 因為入到去每一個 number嘅屋裏面係有一房（三張單人床加衣櫃）一廳一廁。我真心覺得比起而家啲新樓細單位更正! 有相自己睇下:
當然家姐心有少少微言話呢三張床冇得拍埋一齊，唔可以好似鯉魚門渡假村咁樣喺上面碌嚟碌去，但係我嘅感覺係非常之滿意，起碼唔使同人共用洗手間同埋沖涼嘅地方。
放低嘢同check晒d 電器之後，第一站就係泳池，因為比較老少咸宜嘛。所以大概兩點半，我哋就一大班人慢慢行去位於山腳嘅泳池。去到嗰陣有少少驚，因為個門口有個牌寫住話泳池維修暫停開放!! 好彩當我哋推門入去嘅時候個工作人員話呢個牌係錯嘅（咁都得?!）。咁我諗大家都估到，喺我地嚟之前係無人喺裡面，無錯，我地係包場! 而救生員哥哥亦都係喺我哋到之後先至行過嚟。雖然早上喺市區係有天陰同有少量雨，但我估計喺麥理浩夫人渡假村應該係全日天晴。因為我哋跳入水嗰下，真心大叫咗一聲"溫泉呀!"。水嘅溫度係拍得住我哋沖熱水涼嘅水咁舒服呀! 於是乎我地喺個泳池度輕輕鬆鬆地玩到4點幾..
之後我地兵分兩路，工人同細佬意番房食奶沖涼瞓覺，我同家姐心去咗位於山腰同山頂之間嘅手工藝室。
本身手工藝室隔離應該有個小型哥爾夫球場，但今日冇開。今次手工藝室個叔叔遲左少少，但就造就左少少時間比家姐心同另一個小朋友一齊觀察大自然（咁啱見到兩隻巨型大蟻合力搬緊一條蟲番屋企）。
本身手工藝室隔離應該有個小型哥爾夫球場，但今日冇開。今次手工藝室個叔叔遲左少少，但就造就左少少時間比家姐心同另一個小朋友一齊觀察大自然（咁啱見到兩隻巨型大蟻合力搬緊一條蟲番屋企）。
叔叔嚟到見到我地得兩個小朋友，就好好人咁畀我哋揀做邊樣手工。最後決定做一朵花（家姐心嘅堅持令隔離個小朋友放棄左條蛇），成品算係幾靚㗎。做完手工之後，已經五點半啦。我哋拿拿林上番房沖涼，因為六點鐘就係食飯時間。
本來我對渡假村嘅膳食係無乜期望，但估唔到嘅係原來十個人都只係得5個餸啫，仲要兩味係瓜，一味烚菜，一味水蛋, 非常清腸胃... 其實都係想人加餸啫，而我哋眼見八成嘅枱都係有加餸㗎，每一枱都大概係加一至兩個餸不等，真係一個非常好嘅營銷策略!
食完之後，先同家姐心去隔離兒童遊樂場玩左陣，就去咗隔離嘅小型車場度玩。
原本我哋以為小型車場即係單車場，最後發現原來唔係喎，玩嘅居然係小型電動車（驚喜!） 另外仲有啲細細架嘅車仔。你睇下家姐心細路意玩得幾開心!
玩咗我諗有五六十個圈之後，大人終於頂唔住，因為餵蚊餵得太犀利。我哋就決定落返去山腳嘅泳池旁邊嗰個康樂館，小朋友當然冇反對，因為裏面有兒童遊樂室。 呢個康樂館，其實都算幾多嘢玩，除咗一般嘅煮飯仔之外，仲有啲小型嘅球類遊戲機，例如小型籃球架，足球機，小型足球龍門，咁當然都唔少得有滑梯啦同車仔。小朋友喺一邊玩，大人可以去隔離間閱讀室，有當天嘅報紙同埋當期雜誌。如果意猶未盡，康樂室係有唔同嘅棋類或者board game可以借番營舍玩。
原本我哋以為小型車場即係單車場，最後發現原來唔係喎，玩嘅居然係小型電動車（驚喜!） 另外仲有啲細細架嘅車仔。你睇下家姐心細路意玩得幾開心!
玩咗我諗有五六十個圈之後，大人終於頂唔住，因為餵蚊餵得太犀利。我哋就決定落返去山腳嘅泳池旁邊嗰個康樂館，小朋友當然冇反對，因為裏面有兒童遊樂室。 呢個康樂館，其實都算幾多嘢玩，除咗一般嘅煮飯仔之外，仲有啲小型嘅球類遊戲機，例如小型籃球架，足球機，小型足球龍門，咁當然都唔少得有滑梯啦同車仔。小朋友喺一邊玩，大人可以去隔離間閱讀室，有當天嘅報紙同埋當期雜誌。如果意猶未盡，康樂室係有唔同嘅棋類或者board game可以借番營舍玩。
家姐心同細佬意就各有各玩，家姐心始終都係鍾情煮飯仔，細佬意就不停男兒當入樽同埋推車仔，大人就輪住去睇小朋友同埋喺閱讀室嗰度傾下偈。
呢個時候老公話想去旁邊文娛館裏面嘅卡拉ok房睇下，於是兩個小朋友就暫時交畀工人，我哋成班大人就過咗去八卦下。文娛館本身有乒乓球室，氣墊球室，小食角同同埋卡拉ok。而小食角裏面可以睇電視，不過留意係成個麥理浩夫人度假村嘅訊號接收都比較差，除咗電話接收唔好之外，電視係收唔到翡翠台（?!)，但係j2 j5同埋新聞台就會收到，所以想追劇嘅朋友要注意。講返卡拉ok室，廣東話女歌手都係比較新嘅，有大量嘅容祖兒同其他英皇嘅歌手，咁當然主打舊歌唔會缺少啦。
唱咗幾首之後，望下個鐘都九點半，係時候接番啲小朋友返房沖涼瞓覺。當我地成班人行番去康樂室嘅時候，一開門已經聽到家姐心好大聲咁笑緊...所以話小朋友嘅精力真係好利害...
唱咗幾首之後，望下個鐘都九點半，係時候接番啲小朋友返房沖涼瞓覺。當我地成班人行番去康樂室嘅時候，一開門已經聽到家姐心好大聲咁笑緊...所以話小朋友嘅精力真係好利害...
留言
張貼留言