BB 醫生 Encore 篇

自從上次同家姐心去完大圍參加探訪老人中心嘅活動之後，家姐心就非常積極準備下一次嘅探訪（即使我未報名）。經過佢不斷問我幾時係下一次，兼見佢好努力咁畫畫（佢話要送比老人中心啲公公婆婆）同練拍波（上次佢本來想表演唱歌但最後有啲怯場，於是佢話想試啲新野），於是就安排喺佢開學之前一日，同細佬意一齊去玩。


報名方法好簡單，只需要預先幫6個月1至6歲嘅小朋友喺bb 醫生個網登記要會員，之後有想報名嘅活動就可以簡單click幾下，再用PayPal 或者credit card 比錢。今次我地報名嘅係去青衣長安邨老人院舍，每個小朋友報名費hkd120。

另一個比家姐心去嘅原因係，家姐心一向好抗拒當眾表演，我同心意爸爸都知呢啲野真係無得迫，只有順其自然。難得佢自己話想表演，又可以做義工，就帶埋細佬意一齊去玩。

兩點幾已經喺青衣站等集合，細佬意已經忍唔住熱身。



嚟到長安邨院舍，一眾老友記已經坐定定等小朋友。雖然有啲老人家行動不便，但當小朋友開始周圍同佢地打招呼，都非常高興。家姐心亦急不及待送出自己準備左好耐嘅畫作。




主持人簡單introduction之後，就係輪到小朋友逐一同老人家們打招呼同表演。我鍾意bb醫生嘅安排係，所有表演係輕鬆進行，即使小朋友淨係出去介紹自己老友記一樣高興。家姐心同細佬意係第6/7個出場。有細佬意喺旁邊嘅家姐心係特別唔同啲，佢居然喺細佬出場之前同細佬講:"唔駛驚呀！家姐喺度睇住你!" 細佬意當然係無乜理佢...

本來叫細佬意表演跳舞，但當細佬接過主持人嘅咪之後就變左表演"食雪糕" ...=="




到家姐心啦，拎住個私家波，喺全場幫佢打氣數數下，一口氣拍左60下!





所有小朋友表演完之後，就到派貼紙同手帶嘅時間，小朋友都好落力將佢地派到公公婆婆手中，順便再同佢地傾下計。
最後唔少得當然係全場大合唱!



作為一個簡單嘅義工活動，比小朋友知道原來社會上有啲需要特別照顧嘅老友記之餘，又可以識下其他朋友仔同練下膽。醫生bb係一個唔錯選擇。

留言

張貼留言

這個網誌中的熱門文章

麥理浩夫人渡假村1行10人兩日一夜之旅 (Day 1)

圖片
話說復活節同家姐心去左鯉魚門渡假村覺得好好玩，今次暑假就同埋公公婆婆姨婆工人連自己一家四口試下呢個自己應該有廿年無嚟過玩嘅麥理浩夫人渡假村。由於係暑假呢個黃金檔期，三個月之前就要同人鬥快打電話去訂位 (康體通真人接聽電話:2927 8080)，成功之後去任何體育館交錢就得。除暑假外, 其他時間都唔會太Full, 尤其如果想試下先唔想過夜，日營+黃昏營係一個唔錯又無咁多人嘅選擇。 麥理浩夫人度假村位於西貢北潭西貢郊野公園，由於喺自然保護區裡面，所以要拎禁區紙先可以入去。我地人多，最方便嘅方法都係去西貢鄧肇堅運動場等免費接駁巴士。呢架巴士喺訂營嘅時候已經Tick 埋，之後喺入營前大概兩個星期會寄資料同提你上巴士時間。 我地上車時間係1:30PM， 所以朝早先開始執拾行李。循例都會同家姐心傾下要有帶的啲乜嘢，以下我哋以下係我哋嘅手繪packing list。 復活節嗰次我地都有畫packing list, 但3個月後嘅家姐心明顯地肯主動啲同諗得深入啲（例如唔係淨係識帶玩具）。見住小朋友嘅進步係做人父母最大成就感! 我哋執完嘢之後，其實我哋都有啲嚇親因為原來三個人（兩公婆加工人）帶住兩個小朋友去一個兩日一夜嘅camp 嘅行李量同我哋兩公婆夏天去一趟歐洲係差唔多... 正式出發啦！家姐心同細佬意都異常興奮! 去到指定嘅集合地方-西貢鄧肇堅運動場門口， 早咗十零分鐘，小朋友又可以玩到癲。 喺鄧肇堅運動場等shuttle時有少少擔心，因為仲係有啲雨，上車嘅時候都係要擔遮，好彩上咗車後沿途見到天開始清同有少量嘅太陽，心情都好返啲。成程車去到渡假村嘅時間大概係四個字左右，shuttle bus喺正飯堂同辦公室嘅門口停低。落車之後，所有人會入飯堂等briefing 同埋攞門匙。 臨走之前記得影底門前個board，會話你知今日有咩設施有開。 我哋今次分派到係四間三人房，房嘅位置都算係山頂。聽到山頂都有少少驚，因為之前去過鯉魚門渡假村，住山頂係真係行到腳震，所以都係懷住戰戰兢兢嘅心情睇下今次嘅山頂係有幾咁挑戰極限。 Surprisingly 都只係由飯堂（山腰位置）行左大概係十分鐘嘅就到，唔算係太辛苦嘅斜路，沿途風景亦十分心曠神怡。 本來對房間係無期望，但打開門...
閱讀完整內容

鯉魚門渡假村兩日一夜之旅 （Day 1）

圖片
Day 1 因為平日要返工嘅關係，成日都覺得同小朋友少咗啲親子時間。所以趁住復活節可以攞到兩日annual leave 就試下book咗鯉魚門渡假村兩日一夜宿營。相信去過鯉魚門渡假村嘅朋友都知道，鯉魚門渡假村嘅地勢係有小小陡峭嘅。住宿嘅地方喺山頂，如果要活動呢係要落去山腰或山腳，到食飯/騎馬係要落去另一邊山腳。所以去呢個渡假營玩都對體力有一定要求。由於淨係得我一個放假嘅關係，所以今次淨係同家姐心一個去住先，下次再同細佬意去。以下係家姐心出發前嘅準備圖... 17號嘅晏晝，一個風和日麗嘅日子，我哋同埋家姐心嘅一個同學同埋佢媽咪一齊出發去鯉魚門渡假村。 我地大概兩點零鐘到達村口。我地首先拎左鎖匙，擺低我哋嘅行李上去位於山頂嘅房間之後，終於可以落山進行我哋第一個活動-兒童繩網。 家姐心同同學仔好似馬騮咁玩完一輪之後，就頂唔順頂轉去左旁邊一個比較靜態少少嘅活動-做手工。做手工嘅活動室喺主要活動大樓地下嘅冷氣房，每節時段大概20分鐘左右，會有個工作人員會教小朋友做啲簡單嘅手工。我哋當日做嘅係蝴蝶。 做完手工之後一小朋友就蠢蠢欲動想再活動下。 但由於烈日當空嘅關係，我哋就去咗隔離嘅室內舞蹈室同老師一齊跳舞。咁但係，呢度導師主要係教一啲類似大媽舞嘅風 格嘅，所以小朋友都未必識欣賞。 好彩今次都冇其他人喺個舞蹈室裏面，所以導師都由得佢地播住學校啲歌自己有自己跳，跳得好開心。 跳完舞一出去戶外，就見到我地嘅童年回憶- 跳飛機！所以我呢個貪玩嘅媽咪當然捉住佢兩個小朋友一齊跳。 跳完一輪，我地就轉戰位於舊咖啡閣對出嘅一個遊樂場。呢個遊樂場就同我哋一般係屋企附近見到嗰啲差唔多樣，但係因為有兩個小朋友一齊玩嘅關係，淨係你追我逐，瀡下滑梯都覺得非常之高興。 上上落落玩咗一輪之後，差唔多6點夠鐘食飯啦 ！所以我哋就慢慢碌番落去山腳嘅飯堂準備食晚餐。至於度假村嘅嘢食啦喎...叫做食飽肚痛就算啦... 匆匆食完飯之後，兩個小朋友當然係意猶未盡繼續玩！但由於天開始黑，怕餵蚊，於是我哋就再由山腳行返上去山腰，去到主要活動大樓對面有一個兒童嘅室內遊戲屋。 呢座遊戲屋呢係由三間房組成，兩間細少少嘅房有大量煮飯仔用品同積木，大房裡面有滑梯同其他大件啲積木。連埋其...
閱讀完整內容

鯉魚門渡假村兩日一夜之旅 （Day 2）

圖片
嚟到從宿營嘅第二日，其實時間唔係好多，因為十一點半前就要交鎖匙。我哋八點零鐘起身梳洗之後，就去番山腳嘅餐廳食早餐。本來想同家姐心去旁邊嘅馬術學校睇下馬 ( 鯉魚門渡假村最特別嘅地方就係有一間騎術學校喺個canteen旁邊，但最起碼要6歲以上先有得騎），但咁啱原來嗰日係休息日所以無得入去。 食完早餐之後，我地行番上山腰位置，因為家姐心都係非常念念不忘個繩網，所以趁仲早唔太曬嘅時間，我哋又去咗成網玩咗一輪。 玩完經過手工藝室又心思思入去八卦下，跟住我哋就整咗一對母女裝嘅手繩(非常浪漫!）。本身想去隔離玩埋室內攀山但無開放。 之後我哋都上左去主要活動大樓第二第三層揾野玩。 上到去有好多唔同嘅活動例如射箭，草地滾球，康樂棋等活動，但對一個四歲嘅小朋友嚟講，都唔算太適合，所以我哋望下就返落去。 話咁快時間差唔多啦，所以我哋要返上去間房度執嘢交鎖匙。整個過程非常順利，家姐心都自動自覺幫手，最後仲自己將個行李拉番落山。 交完鎖匙之後趁有少少時間，就同家姐心踩咗陣單車。 不過嗰陣已經有啲曬，踩咗兩三個字已經頂唔順。最後我哋就等免費shuttle bus 去柴灣,再轉車返屋企。 如果去宿營嘅朋友我會建議book埋之後嘅日營。因為宿營嘅活動時間到11點就會完，但12點先食飯，book左日營就可以填補埋呢個空檔。如果小朋友仲有一兩個欲罷不能嘅活動仲可以食完飯再玩埋，之後先輕輕鬆鬆搭shuttle bus離開。 總結返兩日一夜嘅活動，其實好難得同個女可以二人世界足24小時。因為平日又番工又有工人，好多時都會分薄咗啲時間同專注力。所以有機會都會再試下! 費用方便，其實兩日一夜嘅宿營嘅人頭費只不過係幾十蚊港紙(週末會貴少少但都唔過百蚊），小朋友仲有半價。另外每一餐飯就大概係20蚊(人頭計）。如果之前唔訂餐到時先買會貴少少。 而日營價錢更平30蚊有交易，所以政府呢啲嘅渡假中心其實係好抵玩。 再提一提，記得帶足夠蚊怕水，如果唔係就好似心家姐咁... 我哋八月會試下麥理浩夫人度假村。今次我會擴大規模- 一個扶老攜幼嘅宿營，一行11人! 到時再post!
閱讀完整內容