心意一家大作戰

難得兩公婆去二人世界，本身都諗住去澳門，但去過好幾次又唔係有新野想試，所以就試下cruise trip，可以順便當做資料搜集為下次全家出遊作準備! 今次join左海洋航空者號3日2夜全公海之旅，純玩船上設施。星期五出發，1點半已經可以上船。我地大概2點零就入去啦！ 由於上船時間有幾個鐘，人流都算分得幾散，好快就過到關上到船。 上到去第一件事當然係拎房，我地揀左海景房(6樓)。由於我上一次上船(大概有10年前上麗星)嘅住房經驗太差(上次係公司包船但我抽到最細嘅內艙房T.T), 所以本身對間房係零期望。今次間房係船頭位置，仲要屈入條巷仔度，心諗今次又出事? 一開門入到去，好，驚，喜，呀！有圖有真相! 感覺仲闊過隔離嘅4人家庭所。 放低野之後，本來諗住去12樓問下個spa之後去游水，問完先知原來今日做spa package 會送多25分鐘，本身鍾意按摩嘅我地就即時book埋3點半嘅spa.... 做spa之前我地去左11樓嘅泳池行個圈。 呢架船啲游泳池分得比較散，有四小個，所以每一個嚟講呢對大人都唔係太夠大，不過for小朋友玩下其實係唔錯，因為小朋友應該會興奮咁呢個池試下嗰個又試下。另外我都幾鐘意佢可以借埋唔同size嘅救生衣比小朋友，著住落水大人就冇咁驚。除咗游泳池之外，呢一層呢亦都有好幾個按摩池，呢啲按摩池係24小時開放嘅，所以無時無刻都會有人喺度浸。 話咁快就夠鐘做Spa，我哋揀咗75分鐘嘅package 咁另外再加埋佢送嗰25分鐘。感覺係如果有太多時間唔知做乜又想輕鬆下都可以試下。以佢收緊Mira Spa嘅大概8折價錢（100分鐘價錢係USD200 -連18% service charge，Mira大概係hkd1000一個鐘但包埋unlimited sauna），我會覺得啲細節可以做得好啲: 首先喺客人等緊嘅時候可以沖番杯茶，香薰油嘅選擇可以多啲，按緊嘅時候可以播番啲音樂，裝修亦可以稍作翻新等。按摩嘅手勢我就覺得可以接受，但因為欠缺頭先講嘅配套，同始終按緊嘅時候不停都聽到架船有啲e e 聲，其實都會影響到想放鬆嘅心情，除非好攰好攰啦如果唔係都未必係好值得encore。(按完攪到我好想去Mira Spa...) 之後就係全船compulsory 嘅演習。 解散後就夠鐘...

識得我夠耐嘅朋友都知其實我係天生攣頭髮。 攣嘅程度係，如果我唔整負離子會變咗麥當勞叔叔咁樣... 話說我啲頭髮係小學先開始變成咁，所以當我仲係幼稚園嘅時候，我都係可以紮辮番學，而細細個最記得嘅就係我媽咪幫我紮孖辮嘅日子。到而家有咗家姐心，其中一樣我最鍾意同佢做嘅就係幫佢梳頭同埋紮辮，感覺呢個係我同佢其中一個最親密嘅時候。 雖然我資質有限，學極都唔識一啲比較復雜嘅髮型，唔緊要，正如我成日同家姐心講，"練習多啲，一定得!" 由紮一條馬尾開始，記住同珍惜同個女嘅親密時光。希望阿女將來睇番呢個blog都會懷念我幫佢扎頭髮嘅日子。

趁打十號風球，一於喺屋企試下新野- 中秋月餅! 本身諗住同家姐心一齊親子玩下，但佢似乎對窗外打風嘅情景比較有興趣，唔緊要，等我試一次，下次先同佢玩! 網上實在有太多食譜，集思廣益之後都係都係用左 Eric's Bakery - 傳統廣東月餅 以下係自己製作嘅圖片: 過多兩日等佢回埋油，試左味，就可以再同家姐心玩啦！

繼上一次彈完Twinkle Twinkle Little Star/ ABC song， 好多親戚朋友嚟咗我屋企聽完都對家姐心讚不絕口，佢就好似上咗鏈咁樣每日都自動自覺練琴，雖然好多時佢練琴日我都未必喺屋企(因為我要返工)，但返到屋企之後見佢好興奮同我講話彈首歌畀我聽/同我合奏嘅時候，個心都覺得非常之甜，所以話 positive reinforcement對小朋友係非常重要! 早兩日呢就同家姐心試咗呢一隻新歌，都係耳熟能詳嘅小朋友歌，大家一齊欣賞下啦! 希望家姐心可以繼續喺音樂裡面揾到自己嘅樂趣。

話說家姐心好貪靚，亦好鍾意公主（唔知點解而個個女仔都鍾意公主...），之前趁放暑假，就買左一張公主美甲貼紙送比佢，幫佢扮靚靚。 本身買嘅時候無諗咁多，總之就係靚啦！但慢慢發覺原來呢張貼紙都有估佢唔到嘅作用。 因為家姐心個人比較慢熱同小心，對住所有新野都會抱住非常懷疑嘅態度，甚至有啲怯! 今年暑假同佢報左游水班，第一堂基本上係唔肯落水咁濟... 到第二堂之前，唔得，要諗個辦法，於是我就拎出呢張美甲貼紙同家姐心有以下對話: 我: 心心，你鍾唔鍾意呢張貼紙? 心: 鍾意。 我: 點解呢？ 心: 因為有好靚嘅公主，有阿Belle, Cinderella同Arora. 我: 其實佢地除左靚，仲有一樣好重要嘅野佢地先做到公主，你知道係咩嗎？ 心: 佢地有好靚嘅裙! 我: 啱! 但除左靚裙，公主都係非常勇敢! 你記得阿Belle 好勇敢去救佢爸爸嗎？心心係咪都想好似公主咁勇敢? 心: 係! （因為真係好想做公主!） 我: 好! 咁媽媽而家將呢啲勇敢貼紙送比你，咁你就會好勇敢，唔會怕上游水堂! 之後上完堂，家姐心主動同我講:"好彩有勇敢公主喺我啲指甲度，所以我唔驚啦！" 媽媽希望呢份勇敢可以一直陪住你長大，面對之後嘅難關!

上一次去完清新地玩咗diy 冷面之後，家姐心成日問我幾時自己買返部機玩下。好彩同同事傾開，原來佢屋企有一部，仲好耐都冇用過添，於是就借咗返屋企同家姐心一齊玩下 。 今次時間關係，只係求其喺網上搵咗個整烏冬嘅食譜（低筋麵粉300g，鹽15g，暖水140ml）就膽粗粗試下整。 麵包機幫我整個麵團出嚟，用保鮮紙封住等60分鐘，再放入密實袋㩒扁佢然後摺埋（重覆5次），就可以放入呢個麵條機。 煲一煲滾水，放入啱啱整好嘅麵條，一邊用筷子攪住煮5分鐘，拎出嚟過冷河待用。 要食嘅時候煲煲滾水煮15秒就食得，湯麵撈麵都ok! 感覺簡單同乾淨利落，整落亦都唔難，效果唔錯。 下次再整可以試埋粗麵，或者試下其他麵粉睇下會唔會再彈牙啲! 【按我】重温清新地之旅

自從上次同家姐心去完大圍參加探訪老人中心嘅活動之後，家姐心就非常積極準備下一次嘅探訪（即使我未報名）。經過佢不斷問我幾時係下一次，兼見佢好努力咁畫畫（佢話要送比老人中心啲公公婆婆）同練拍波（上次佢本來想表演唱歌但最後有啲怯場，於是佢話想試啲新野），於是就安排喺佢開學之前一日，同細佬意一齊去玩。 報名方法好簡單，只需要預先幫6個月1至6歲嘅小朋友喺bb 醫生個網登記要會員，之後有想報名嘅活動就可以簡單click幾下，再用PayPal 或者credit card 比錢。今次我地報名嘅係去青衣長安邨老人院舍，每個小朋友報名費hkd120。 另一個比家姐心去嘅原因係，家姐心一向好抗拒當眾表演，我同心意爸爸都知呢啲野真係無得迫，只有順其自然。難得佢自己話想表演，又可以做義工，就帶埋細佬意一齊去玩。 兩點幾已經喺青衣站等集合，細佬意已經忍唔住熱身。 嚟到長安邨院舍，一眾老友記已經坐定定等小朋友。雖然有啲老人家行動不便，但當小朋友開始周圍同佢地打招呼，都非常高興。家姐心亦急不及待送出自己準備左好耐嘅畫作。 主持人簡單introduction之後，就係輪到小朋友逐一同老人家們打招呼同表演。我鍾意bb醫生嘅安排係，所有表演係輕鬆進行，即使小朋友淨係出去介紹自己老友記一樣高興。家姐心同細佬意係第6/7個出場。有細佬意喺旁邊嘅家姐心係特別唔同啲，佢居然喺細佬出場之前同細佬講:"唔駛驚呀！家姐喺度睇住你!" 細佬意當然係無乜理佢... 本來叫細佬意表演跳舞，但當細佬接過主持人嘅咪之後就變左表演"食雪糕" ...==" 到家姐心啦，拎住個私家波，喺全場幫佢打氣數數下，一口氣拍左60下! 所有小朋友表演完之後，就到派貼紙同手帶嘅時間，小朋友都好落力將佢地派到公公婆婆手中，順便再同佢地傾下計。 最後唔少得當然係全場大合唱! 作為一個簡單嘅義工活動，比小朋友知道原來社會上有啲需要特別照顧嘅老友記之餘，又可以識下其他朋友仔同練下膽。醫生bb係一個唔錯選擇。 BB醫生連結 第一次去bb 醫生 【按我】