Royal Caribbean Voyager of the Sea -兩公婆Get Away Cruise Trip (Day 2)

第二日嘅早餐我哋上咗11樓嘅自助餐，九點鐘上到去其實都好多人，我係有啲懷疑啲人係冇走過㗎... 嘢食種類以西餐為主，有少量嘅中式點心，如果你係本身鍾意食西式早餐，應該可以滿足到你八九成嘅要求呀!

早餐過後，終於可以去泳池旁邊hea 下。坐喺池邊望住啲小朋友走嚟走去，我都有啲掛住家姐心同埋細佬意...

游完水之後我哋返咗房間梳洗，因為要準備去睇11點鐘喺5樓皇家大道嘅"夢工場大巡遊"。 我地去到嗰時已經有部分人喺大道上嘅餐廳門口坐定定等睇show。因為有啲人去咗睇李居明show 所以人流都尚算ok。等咗一陣就開始見到啲卡通人物出嚟啦，有Shrek，Puss in boots，Madagascar 嘅獅子仔Alex河馬女Gloria，仲有嗰幾隻好搞笑嘅企鵝，功夫熊貓等等， 好精彩好好睇，正過Disneyland呀! 由於皇家大道唔係好長，所以呢啲咁得意嘅公仔來回喺我地面前又唱又跳，又同旁觀者互動。我覺得呢個活動絕對係大人細佬都啱睇!

Parade過後，我地就上船頭睇海。船頭其實就係我哋房間望出嚟嘅位置，感覺好舒服! 好有Titanic裡面 Jack同Rose 喺船頭扮飛嘅感覺...但我老公係唔肯睬我 T.T....

午餐時間到! 終於唔使同人逼，因為我哋book咗間3樓嘅意大利餐廳Giovanni's。由頭盤食到main course再食埋個甜品車，份量同埋味道都好唔錯，服務一流，所以我覺得呢個午餐15蚊美金係幾抵食! 如果夜晚喺呢度食一個差不多嘅餐牌就要俾30蚊美金啦，所以我會建議大家試下佢嘅午餐啦！

好輕鬆食完個午餐之後，又有另一個show開始! 今次係溜冰嘅表演，盛惠每人9蚊美金。但我可以講，一。定。要。睇! 因為真係好好睇。同埋我哋發覺，原來喺呢架船上面，serve
緊你嘅crew 隨時係世界溜冰錦標賽嘅冠軍! 因為我地發現，溜冰表演裏面其中一個主角就係尋日係演習嘅時候喺幫手維持秩序嘅嗰個靚仔!

睇完show, 又上番12樓睇人玩沖浪，老公話驚自己太重沖唔郁 ... 除左沖浪，仲有攀石，籃球同mini golf，玩晒都會幾累。

之後我地又八八卦卦去睇下個青少年活動中心有咩活動，原來都幾正㗎喎，全日唔同時間都安排咗唔同嘅活動俾唔同年齡層嘅小朋友，真係可以由朝玩到晚。另外仲發現有機鋪，cupcake班可以畀啲小朋友參加。

五點半，又到食飯時間。今日我哋照樣去咗Sapphire Dinning。嘢食一樣都係無乜特別，但因為係臨落船之前一晚，成間餐廳嘅waiter waitress 準備咗一個歌舞表演! 全場氣氛都非常之咁好呀! 雖然之前啲嘢食爭少少，但係呢個表演都幫佢攞返唔少分數。

食完嘢之後同老公去咗溜冰! 個溜冰場就係之前做表演嘅地方。每個人都要戴頭盔，小朋友仲要帶埋護膝護踭。奈何一向平衡力麻麻哋嘅我加埋好耐無玩溜冰嘅老公，玩多幾個圈就放棄啦... (真係好水皮...)

另外一個喺船上嘅好處，就係當都冇咩嘢做嘅時候，其實喺唔同嘅小餐廳或者係皇家大道都會有樂隊/歌手/樂手表演。其中最受歡迎嘅，應該係菲律賓呢一隊。當佢地表演嘅時候會有一大堆嘅觀眾圍住佢地一齊唱! 佢地除左自打唱英文歌，都有一啲普通話歌，其中最受歡迎嘅歌就係譚校長嘅《朋友》。

今晚宵夜時間有個魔術表演，睇之前我地決定去試下位於12樓嘅美式餐廳，係食burger嘅地方，裝修得非常之似嗰啲美國好地道賣快餐嘅地方，感覺有啲似Men in Black 兩個主角成日去嗰間餐廳。份量亦係美國人份呀....

食飽飽去睇魔術表演，天呀…點解可以咁多人...
最後我地要企喺度睇...anyway,睇完已經好眼瞓要番上房休息，上到房見到佢，心情又好番啲...