最近睇緊陳美齡- 《50個教育子女的方法》

之前睇左陳美齡嘅自傳，好有興趣睇埋佢教佢三個囝囝嘅心得，所以去書局買埋佢呢本《50個教育子女方法》。

我唔係要家姐心同細佬意入史丹福，我只係見到陳美齡同佢三個囝囝嘅關係一直都好sweet，而更重要係，佢都係一個working mum! 仲要係一個工時一定比我長嘅working mum。究竟佢係點做到? 睇完呢本書可能會有啲啟發。

拎上手，呢本唔係一般厚典典嘅育兒理論，以我咁心急嘅性格，睇字典並唔係我杯茶。打開，每一個方法都係一個chapter，每一個chapter都只係3-4頁，裡面嘅內容有8成都係實例或者應用，適合我呢啲比較實際嘅媽媽!

以下我揀左5個印象特別深刻同可以即時應用嘅主題:

1) 家長承擔教育的全部責任
呢個chapter係比我自己嘅一個重要提醒。我有時會以工作為理由，將教育嘅責任比左學校，甚至上門補習嘅姐姐，但真心講，陳美齡做明星一定忙過我做銀行。即使我會揾學校或者姐姐幫手，但想點教始終要自己掌控住。再講，其他人點幫都只能教書本上嘅野，作為同小朋友最親近嘅人，身教先係最緊要。我記得有一次家姐心忽然講左一句"痴線"，我個心真係離一離，正想問一句"邊個教你講?" 但即刻諗起呢句咪就係我嘅口頭禪?!...嗰刻係後悔到想打自己一巴...

2) 有出頭的勇氣
而家喺香港呢個地方，當有人講出一啲與別不同或者同現有制度唔一樣嘅諗法時，都會畀人覺得係搞亂檔。但我覺得作者喺本書裏面講得好啱嘅係，只有與眾不同嘅思想先會令呢個社會進步，就係因為每日都有啲人諗啲新嘢出嚟，先會推動呢個世界向前。而我哋要訓練我哋嘅小朋友，就係令到佢地有獨立思考能力之餘，亦唔可以因為要人云亦云/怕其他人嘅眼光而埋沒自己嘅諗法。要做到呢樣其實係由細開始我哋要鼓勵佢地有信心去表達自己，製造一個令小朋友放膽開聲嘅氛圍。我會keep住提醒自己的!

3) 感恩
而家呢個社會嘅小朋友係好幸福嘅但好多時佢哋唔知，問題係，點樣先令佢地知?會唔會太細個? 作者建議早啲比小朋友做義工。我同意，但我覺得仲可以同佢地睇報紙/新聞。睇報紙/新聞我唔係可以日日同佢地做到，但慢慢試，效果係見到嘅。首先我會同家姐心解釋報紙係話比我地知呢個世界發生緊咩事，因為呢個世界好大。跟住揀啲簡單(而有圖片)嘅新聞，例如邊度打仗/打風/有人無可歸，同佢分享下，等佢身邊有好多大事發生緊，而自己亦係好幸福嘅一群! 試過有一次我同佢行街，佢指住一條裙話好靚想買，但過左兩秒佢就問我，"媽咪啲窮嘅小朋友係咪無呢啲裙?" "窮嘅小朋友唔單止無呢條裙，佢地無咁多衫揀嚟著㗎，所以我地要珍惜，唔可以浪費。""咁我地唔買啦，因為屋企仲有好多衫!"

4) 點解要番學?
呢個問題，大部分小朋友(包括我自己細個)都無諗過。因為從來都覺得係"人人都番學，所以番學。"或者"媽咪叫所以番學!" 但認真講點解要番學呢？我同家姐心講:"可以番學係一件好幸福嘅事!" 以前嘅人細個唔係學讀書寫字，係去學耕田，但慢慢地人開始明白智慧同知識嘅傳承係需要靠文字，而呢個，正正係番學嘅初衷! 而現代人讀書識字，即使唔諗到知識傳承咁偉大，單係為左可以認識呢個多姿多彩嘅世界，同多啲唔同嘅人溝通，其實已經係一件好幸福嘅事!

5) 陪孩子做作業
睇到呢個標題嘅時候，其實我都有啲驚，因為家姐心升上k2之後開始每日都會有兩至三樣功課。真心講，我陪佢做功課覺得好大壓力，直頭EQ大作戰! 之前我都唔信，但原來望住自己個女做功課係可以好多嘢都睇唔過眼... 我係不停同自己講，"忍住唔好擦..忍住唔好話佢做得唔好..." 真係好難好難...難到我有諗過，係咪自己唔應該陪住小朋友做功課呢? 但係睇完呢本書之後又有啲新睇法 - 首先要問自己，"點解要陪小朋友做功課?" 其實做得好唔好只係一個十分短暫嘅結果。重要嘅係，小朋友有無喺做功課當中令佢享受學習，繼而更努力去做好? 呢種努力係自發嘅，而且更sustainable。我地做父母嘅責任，就係令小朋友好似家姐心間學校嘅校歌名一樣- 樂在其中! 但點樣先令到小朋友樂在其中呢? 呢個就係每一個媽咪/爹哋需要動腦筋嘅地方，因為每個小朋友都唔一樣。點樣控制自己的情緒之餘，仲要諗計令小朋友享受個過程? 非常有挑戰性，but fascinating!

睇完成本書，當然有啲係新野，但有啲其實自己一早明白，只係日常生活太多野忙，大人（包括我自己）有時會將情緒發洩左喺小朋友身上，呢本書可以係一個好好嘅提醒。

雖然已經睇左兩次，但我都仲經常拎嚟睇番一兩個chapter，每次都有意想不到嘅收穫!

期待廿年之後都可以同家姐心同細佬懿影番張好似陳美齡同個仔一樣咁sweet嘅selfie!