新加坡追星之旅2023

2月 23, 2024

2024年2月：一路以後已經post 左，原來未！可想而知我有幾懶。。。

2023年4月：其實從來冇諗過自己會追星，更加冇諗過第一次追星就要搭飛機。當然追星嗰個唔係我，係家姐心。話說家姐心好鍾意跳k-pop, 連唔肯剪頭髮都係因為跳舞靚啲；當年blackpink喺香港開演唱會，已經叫帶過我去睇，奈何黃牛飛實在太貴，萬幾兩萬一張飛實在太奢侈。當年我嘗試同佢分析，一萬蚊係一個咩概念：我同佢講一萬蚊大概夠你食一年嘅麥當勞早餐，當然佢係唔會一個人去睇，要搵多個人陪，即係兩張飛，亦即係話睇一次blackpink就兩年冇得食麥當勞早餐 ……最後我哋當然冇買飛。當我有一次同個同事傾開偈，佢話佢老婆都好鍾意blackpink，結果飛咗去曼谷度睇。因為飛無炒到咁貴，連埋機票酒店兩個人玩幾日都係萬零蚊落樓，所以當我見到新加坡有blackpink，又適逢佢生日嘅時候，我就諗住當生日surprise送畀佢。低能嘅我google blackpink新加坡，結果 google第一個出嚟嘅網站就係viagogo。當我買完飛我都仲以為自己係official website買咗- 第一係因為價錢一張飛大概3000蚊- 當香港炒到過萬蚊嘅黃牛，我真心以為三千蚊係原價。到買咗之後先知原來呢嗰個係黃牛網，但好多朋友同我講，呢個係全球最大嘅黃牛網，假飛機會好細唔使擔心。於是乎我就滿心歡喜買埋機票訂埋酒店，五月就同家姐心出發去睇blackpink！

望穿秋水終於出發，今次我哋懷住非常興奮嘅心情，仲要襯埋dress code- black & pink, 開始我哋兩日兩夜之旅。

一落機已經係夜晚七點。有朋友介紹我哋去Garden by the Bay睇個light show。效果幾好，人又唔算多。

之後搭返mrt 係我哋住嘅地方，今次book 左little india 一間boutique hotel。麻雀雖小五臟俱全，勝在地點方便，旁邊就係熟食中心。不過真係去到先知原來little India 真係好多印度人...

第二朝起身呀我哋第一個行程就係去Sentosa嘅水上樂園Adventure Cove。一朝早喺熟食中心食個早餐，搭mrt去到Harbourfront，之後再轉Sentosa Express。我哋比較早去到Adventure Cove 所以唔算好多人，同香港水上樂園比較，呢個water park 只有室外嘅部分，刺激度亦冇香港咁高，所以家姐心一個去玩我都放心（我就因為之前整親條腰所以唔敢玩）；另外啲特別嘅地方就係呢個water park呢有 snorkeling浮潛，地方細細可以睇下珊瑚同埋熱帶魚，感覺都幾特別，之後又可以近距離（雖然隔著玻璃）同魔鬼魚相，所以好容易就消磨咗四個鐘。

之後我地返酒店沖涼換衫，換上貼題嘅裝束再出發。

首先約咗一個移居新加坡嘅朋友食個Early dinner，之後就好興奮咁去stadium。

我哋大概六點半左右去到Stadium站，喺度已經開始人山人海，好多人買紀念品同埋向住stadium 方向排隊準備入場。。。

我哋好似沙甸魚咁迫下迫下，逼到七點三四個字，終於去到閘口。攞張飛出嚟，一嘟入唔到，再嘟都係入唔到！心裏面極度不安......問過職員，我哋好似三文魚逆流而上咁樣去詢問處，結果係：“Madam, you are scammed!” 見到個女想喊嘅眼神同埋表情,我心裏面講咗一萬句粗口@#$%&，鬧自己蠢咁都可以上當，跟住問詢問處仲有冇飛，詢問處話唔知喎要去box office，box office原來唔喺stadium，要去Stadium 隔條街嘅商場嘅後面有個好隱蔽嘅counter... 極速九秒九路上狂奔，亂打亂撞，終於去到box office，前面有十條友，一問之下個個都畀人呃🥹 唔同嘅係，只有我哋係由香港飛過去，其他都係新加坡本地人。。。終於排到我哋去買飛counter問佢有冇飛，佢話：“yes, but...” 我話唔使但係啦，即刻畀兩張飛我，基本上入到場就唔理啦。。。攞咗飛之後又係奪命狂奔去stadium- 原來冇冷氣嘅😂😂

入到場一睇張飛個位置，應該有一半時間係睇唔到台上發生咩事- 因為個位係比部分台遮住左。唔緊要，最後去左stadium頂個小食部，揾左個睇到但好鬼遠嘅位置度企住睇，好彩前面嘅人見到家姐心係細路女，所以畀佢企前少少，我喺呢個時間都忍唔住喺後面買番杯啤酒鬆一鬆。。。最後喺只係遲咗兩隻半隻歌嘅情況下睇曬成個表演（How you like that)。。。

睇完演唱會，逼到沙甸魚咁樣搞咗成粒鐘先返到酒店。唔緊要，最緊要係任務完成。

諗返轉頭，由知道張飛係假嘅直到現場買到飛，個心路歷程真係筆墨難以形容，一路同阿女講“no worry, shit happens in life, we'll get thru this! ” 一路諗萬一真係冇飛咁點算呢，先唔好講由香港飛嚟最後無飛係十分戇居，問題係我點樣manage個女嘅情緒呢？係咪可以喺場外空地開住party呢？又上網check緊下一站（即係澳門）有冇飛？嗰廿分鐘喺條街度跑真係過得好。漫。長。入到去之後，熱到hihi咁企喺度睇咗成場show，諗深一層都係好事嚟嘅，話曬係家姐心第一次睇演唱會，如果好順利又坐握手位，咪會太容易呢？今次辛苦啲，有條低啲嘅底線，下次有多啲進步空間，可能都係好事（阿Q精神）。

第三天非常輕鬆，因為只有一個行程-就係去museum of ice cream！

冇錯，呢個museum 應該本地人都無乜聽過。美其名係會解釋雪糕嘅由來同埋啲雪糕嘅資訊，但賣點當然就係可以任食雪糕！

食雪糕之前，我決定畀自己食番個豐富嘅早餐+享受一杯寧靜嘅咖啡，於是在喺museum of ice cream附近搵左間cafe。效果ok喎，嘢幾好食，杯咖啡幾好飲，同阿女玩左超個幾兩個鐘先斯斯然去食雪糕。

另外可以一記嘅係，其實呢度附近有個Botonic garden，裏面有一間米芝蓮一星嘅法國餐廳。如果時間許可下次可以試下。

好啦終於到今日嘅主角- Museum of Ice Cream。本身我自己都無留意，原來去嗰日係母親節，我同家姐因為襯曬衫同顏色嘅關係，畀人upgrade to Premium ticket。Premium ticket有咩著數嘅地方呢? 就係喺任食雪糕嘅同時再加多隻特別味道畀你。不過去到我呢個年紀，都食唔到咁多雪糕，志在同家姐玩下打下卡。