第一次家長義工@自理營（西貢戶外康樂中心）

今年復活節長假期，本身諗住俾小朋友自己參加三日兩夜余Sir自理營，俾自己放下假，所以被邀請做唯一嘅家長義工嗰陣都啲擔心-因為覺得一定會攰過返工……好多😑😑；又覺得搵緊自己笨，明明諗住等小朋友自己去玩我可以放假……但結果去完，我係覺得超！值！得！

今次自理營地點係西貢戶外康樂中心，相對其他政府度假營，好處係大部份平地，唔駛行得咁辛苦（呢個好重要！有去過鯉魚門渡假村同麥理浩嘅朋友應該明我講乜）。活動一共有16個小朋友，兩組女孩子一組男孩子共三組。家姐心同細佬意喺其中兩組，我就係第三組嘅家長義工。

Day 1 中午過後我哋喺調景嶺地鐵站集合，再由旅遊巴送到康樂中心。經過場地簡介之後，余Sir同導師們首先帶小朋友喺成個營地行左個圈先，點解呢?陣間就知。

我鍾意俾小朋友參加余Sir攪嘅camp，因為佢唔係淨係比小朋友放電，每次都會有一連串有啲非常好玩同有教育意義嘅活動同任務🫡。

今次嘅終極任務係寵物小精靈大戰超夢夢兵團。呢個跨世代嘅卡通，大中小朋一聽到都非常之興奮。而呢日小朋友就係要透過唔同嘅遊戲贏energy token🏅🏅，幫自己同隊友嘅小精靈進化，喺最後一日同超夢夢團隊決一死戰！

開始小精靈任務之前係一輪熱身遊戲。我想像中嘅warm up game 係拉下筋，等小朋友互相認識下，但原來熱身遊戲係可以一次過滿足幾個願望！每個小朋友分到一份lego。佢地要根據余Sir描述砌出製成品，余sir只會講一次，小朋友亦不能發問🙊。

玩完個人賽之後，就係團體賽，佢哋要根據特定條件，合力砌出符合條件嘅作品。

一個簡單遊戲小朋友玩得開心投入，同時訓練小朋友聆聽力／專注力／溝通同協作能力🤝，真係比出奇蛋更有驚喜！

正式第一個可以贏得energy token嘅任務：就係要同團隊利用手上哩個工具將指定lego搭高，越高就可以贏得越多token。唔好睇少呢個小小遊戲，訓練溝通能力之餘都訓練手眼協調👀。

每一個小遊戲之後導師都會有一啲分享大家嘅觀察-有咩做得好，有咩可以改善。

6點晚飯時間🍲，坦白講野食係一般㗎啦，不過見到小朋友自己裝飯／裝湯／分碗筷／收拾清枱，作為阿媽嘅我，望住隔離枱嘅兩姐弟，我就發覺原來平時係屋企真係照顧得太好啦！其實只要大人肯放手，小朋友一定做到！

晚飯過後又有新任務：小朋友每人分到一個紙杯同埋一隻生雞蛋🥚，任務係要好好保管，每天導師會檢查，只要隻蛋依然健在的話，佢哋就會收到energy token作為獎勵。

每個小朋友都將珍而重之咁拎番隻蛋番房……當然，有啲蛋未到房已經壯烈犧牲左。

返到房，新一輪任務啦就係要自己鋪床⏰️。小朋友豆丁咁細粒要自己完成整個鋪床程序（入枕頭套／鋪床笠／鋪薄被）都係一個挑戰。余sir會每個小朋友嘅床鋪檢查同評分，亦會以energy token 作為獎勵。

之後小朋友兩個一組，分批進行夜行探險🌙。記唔記得今日晏晝入營嘅時候導師帶佢地行左營地一圈？其實就係為夜行活動作準備。任務當然亦都係搵energy token。

未輪到或者已經完成夜行嘅小朋友就會自己去沖涼喇。喺無媽咪爹吔工人嘅情況下沖涼究竟係幾大嘅挑戰？究竟要喺回來公共浴室同睡房（大概3-40步）幾多次先帶齊野？我果晚見過最高紀錄係8次！ 當然沿路不時會見到衫／褲／毛巾……

沖完涼臨瞓前當然要打俾媽咪爹地報平安☎️。

第二日8點鐘食早餐。我間房有小朋友校左鬧鐘⏰️，5點就開始嚮……當然鬧鐘係鬧佢唔醒㗎，只係鬧醒我去熄咗個鬧鐘🥲

仲要為大家介紹每一組有個好重要既角色-就係揸匙人！ 呢個小朋友好重要，佢要負責全程keep住條鎖匙🔑，仲要記得鎖門！真係任重道遠。

早餐後安排小朋友參加營地活動。政府所有康體營每日開放嘅活動都會因為天氣或者人手而改變，天天不同，所以喺決定玩咩之前一定要去個board度望下今日有咩玩。導師角色都係隔離協助，小朋友會每組傾下去邊度，再一齊出發。

兩個鐘頭嘅自由活動時間，有人去玩射箭🎯／氣墊球／足球機／手工／球類運動🏀……當然，我地嘅任務係唔會停止，每組都有一張問題紙，問題嘅答案黎就係等小朋友去營地唔同地方嘅時候慢慢發掘啦。

午飯後進行咗團體遊戲俾大家贏多啲energy token。

呢個時候余Sir宣佈新任務: 記唔記得琴日果隻蛋？無錯，今日晚飯前會進行雞蛋撞地球嘅活動，同組嘅小朋友要設計一個裝置，令到隻生蛋由二樓掉落街都唔爛！完成到嘅隊伍又會有Energy token 做獎勵。小朋友利用等待營地VR game嘅時間進行討論同設計📒📓📚。

 

緊張嘅時刻：

 

大家都超興奮！

晚飯過後，下一輪協作同信心遊戲。今次呢個遊戲由於需要體力／高度集中／膽量，所以小朋友可以自行決定參唔參加。當然條件係要留心聽指示！ 安全第一，導師都會make sure 每一步都安全先進行。

除咗尋晚嘅執床／沖涼等活動之外，今晚有個特備節目- 就係由小朋友自發嘅晚會表演🪩🪩：

大人小朋友都玩得非常開心。

第三日朝早，我地玩多左一輪營地活動：攀石／射箭／滾軸⛸️／球類活動

最後當然唔少得我地嘅終極任務-決！戰！超！夢！夢！

小朋友把握最後機會，利用呢幾日贏到嘅energy token upgrade 自己同團隊裡面嘅小精靈。最後當然大獲全勝🌈！

歡樂嘅時光過得特別快，又係時候講拜拜！拜拜之前又遇上再為各位小朋友作最後  debrief。

安全將小朋友交返到父母手中之餘，亦會同每個小朋友爹地媽咪講返今次活動觀察到小朋友嘅特點同注意事項。當中有小朋友其實已經跟左余Sir好多次，所以亦會講到小朋友嘅轉變同進步🎢。

今次成個活動非常豐富！如果比我自己安排應該係mission impossible。原來俾小朋友自己嘗試，減少倚賴之餘，佢地互相幫助嘅過程亦都可以學到好多野。

下次即使我唔入嚟做義工一樣可以知道活動期間發生嘅事情，因為余sir 團隊同家長們set up 左whatsapp group, 全程直擊，尤如置身現場一樣！