超有心DIY畢業相簿

話咁快，家姐心就完成咗四年嘅幼稚園課程 。臨別秋波，當然非常之唔捨得😭😭，所以畢業前都約埋幾個好朋友一齊去影返輯畢業相。

想當年我幼稚園畢業，甚至乎小學畢業 ，其實我都影過畢業相(除咗學校坐定定喺度，個頭要用放大鏡先睇到嗰啲類)。但時代進步，我見好多同學仔都已經影咗好多輯畢業相，室內室外唔同場景都有，我都算係最後一批! 今次影相搵咗Photo Bae，攝影師係Wilson。

本身諗住影戶外，去舊校舍附近嘅公園好似有啲紀念價值啲，但無奈第一次出嚟嘅時候落大雨⛈⛈，結果要改期。多謝攝影師哥哥，拎曬啲嘢出到嚟，見到天氣唔對路，都願意畀我哋改期。為咗安全起見，我哋就決定咗擇日去室內嘅studio影。天真嘅我以為會舒服啲，但結果係...

Studio本身地方好大，應該有二三千尺，有五六個場景，十分之多道具。最正，亦係最大鑊嘅地方係，我哋包場+ 全場無阻擋! 所以一去到，都未開始影，小朋友已經玩到癲咗勞勞。我哋由四點幾鐘開始，原本諗住七點一定影完，結果影到八點幾...

由於一共有四個小主角同兩個小小主角(即係細佬)， 秩序方面都係家長們幫手維持。認真，真係好攰，聲都無。不過都幾好玩。

同場加映之兩個細佬玩到癲:

 

影咗三四個鐘頭，包曬所有相，連場地全部加埋唔使二千蚊 ，確實係好抵玩。大概個零兩個星期 就已經send返曬啲相畀我哋。

本身我哋諗住出去整相簿，但諗諗下，都係想小朋友感受成個過程，於是乎又約埋朋友仔上屋企一齊整相簿。雖然預咗個效果冇出面整嘅咁靚，但係我相信呢一本製成品應該會更加有血有肉。

約好左，就即刻淘咗一大堆機關，貼紙，閃石，相框，相簿...預備製作呢個大project。 其實如果懶啲，香港都有啲上樓舖可以畀大朋友小朋友做diy相簿，三個鐘頭相簿放題包曬所有嘢大概三四百蚊， 勝在有人指導，同埋啲機關會再靚啲。我哋今次土炮製作都係用淘寶貨，但就經濟啲。

一班小朋友(同阿媽s)由四點鐘一路整到夜晚食飯七點幾八點，進度各有快慢啦，但家姐心就好似我廊，眼瞓到眼都睜唔大都堅持要完成晒先上床...結果嗰晚搞到十二點幾....但效果係令人感動嘅珞! 希望 到若干年後，我哋再拎返呢一本相簿出嚟嘅時候，都一樣會感受到呢一份用心整作。

協助完成(無錯，因為我所有proposed designs 都需要經過家姐心嘅approval)呢一本相簿之後，激發喺我之前放棄咗一排嘅相簿製作。 本身之前主要都係集中小朋友嘅成長過程，但老實講，自從細佬出咗世之後，都冇乜再整過。但經過今次，可能又係時候的出嚟研究研究。