親力親為 Pink & Bling 生日會

攪過大大小小嘅party, 但好懶嘅我係從來未認真幫心心意意攪生日會，因為怕攪開要年年攪。今年家姐心好早已經同我講話好想有一個生日會，本身諗住快靚正自己上網買野求其請幾個朋友仔就算，但喺聽緊某小學嘅簡介會時忽然靈機一觸， 既然搞就要make it an experience! 因為想家姐心明白每件事唔係飯來張口，亦想佢感受到由零開始去建構一件事嘅喜悅。

19Mar- 決定要攪

20Mar
1. guest list- 請邊個朋友仔完全由家姐心決定，難得佢對請邊個都好有主見，請請下佢會1自己話:"好似太多啦我地應該無位。"

2. 食物list- 8成嘅食物都家姐心話事，我比佢揀食物嘅條件係佢要幫手整到嘅，那怕只係其中一個小步驟，以下係佢嘅手繪食物同guest list:

3. theme- 呢個諗左好耐。家姐心最鍾意粉紅色，又鍾意閃令令，所以主題就係"Pink & Bling" 啦! 邀請朋友仔嘅時候嘅錄音都有講明要著"pink & blink" 㗎!

4. 裙- 一路家姐心都好恨有條長裙。但站喺阿媽立場，一條長裙，唔計錢，但可能只著一兩次又佔地方，所以一路都無買。但生日...算啦，平平地淘寶啦！所以好認真地同家姐心一齊淘...

21Mar

1. 睇場地- 攪每樣活動最緊要係地方。作為人生第一次嘅正式生日會，梗係要同家姐心認真睇下邊個場最啱(雖然只係揀會所樓上或樓下嘅分別)。最後決定係會所地庫! 家姐心仲入埋人地個場度講，"呢度我想掛張有我個樣嘅生日banner..." 哦，收到! 另外就梗係mark低喺calendar 邊日開始可以book 場...

2. 生日蛋糕- 我揾番上次幫我整散水餅嘅Mui Mui bakery, 但款色當然由birthday star 決定! 揀左好一陣，終於揾到個款係鍾意嘅，再將佢改成Pink & Bling 做主題就得啦…

但有一個難題，上面隻公仔要自己揾...於是同家姐心去附近揾，行左個幾鐘，好彩喺奇趣揾到著粉紅色裙嘅Ariel...

3. 淘寶- 除左淘番條裙之外，仲另外揾埋啲"pink & bling" props同埋佈置嘅用具可以影相!

4. 魔術師- 因為唔想自己太辛苦要帶埋遊戲，都係決定揾人幫手...所以我就四出揾下唔同嘅小丑/魔術師之類...最後揾到Jacky, 一個紮氣球超勁嘅魔術師! 揀左個2個人2個鐘連backdrop同氣球柱嘅package!

22Mar
既然日子主題同邀請名單都已經confirm, 就係時候send invitation啦！可以involve 家姐心嘅方法，當然係要佢為每個佢邀請嘅人錄番段invitation 聲帶!
幾經辛苦，encore 無數次， 終於錄左...一半! 下次再努力!

24Mar
雖然個氣球魔術師哥哥係我決定，但都要家姐心同個哥哥溝通下先! 於是乎今日我要佢同哥哥講佢到底要嗰兩支氣球柱係咩樣。諗左好耐，最決定要著粉紅色裙嘅Sophia 同Belle (其實之後諗深一層，兩個都啡色頭髮嘅公主，仲要一樣著粉紅色裙，以扭氣球公仔嚟講到底會有咩分別呢…)。

31Mar
1. 場地- 由於會所場地預約係需要30天之前，所以其實我尋日已經打電話預約左。不過話晒要家姐心親身知道攪生日會嘅細節，當然要佢自己去book場啦！我同佢一齊去到會所，家姐心戰戰兢兢咁同個哥哥講要book場，正當哥哥check完本簿睇到已經比人book左(其實嗰個係我)，我就不停同佢打眼色話嗰個係我，好彩個哥哥醒目，幫手一齊完成呢次"book場任務"!

2. 試裙- 終於等到淘寶到貨! 家姐心急不及待試呢條期待已久嘅長裙!

3. Invitation 錄音- 攪左成個星期，有時太快，有時太慢，有時太細聲...終於今日攪掂send 晒出街! Yeah!

2Apr
蛋糕材料- 今朝約左上同事屋企探bb, 之後再去動植物公園玩到3點，跟住我隨口問家姐心:" 攰唔攰呀？唔攰搭車去油麻地買cupcakes 材料好嗎？" 家姐心一口答應! 我地仲一路決定用cupcake 做送番比小朋友嘅小禮物!

13Apr
Birthday Banner - 仲記得家姐心指定要一張有佢個樣嘅birthday banner嗎？今日收到魔術師哥哥嘅草圖，家姐心都好認真咁比意見:"唔要兩張相，公主要放大啲..."

21Apr
Profile pic for Birthday Banner - 影相呢啲咁專業嘅任務，當然留比daddy la。 因為daddy出trip 出左成個星期，家姐心一路都好擔心，每日都問我幾時可以影相。終於等Daddy 番嚟，第一件事就係換番條長裙影靚相。

23Apr
仲有幾日就到生日會啦，係時候要設計送比小朋友嘅禮物啦！本來有諗過畫卡，但家姐心話畫咁多張好辛苦...所以做阿媽都係幫佢諗個簡單版本啦！咁啱屋企有啲用淨嘅字母貼，就同家姐心夾手夾腳整呢啲禮盒嚟裝cupcake! 效果都幾好!

26Apr
仲有兩日! 食完晚飯同家姐心一齊做個stock take, 屋企有咩野食物係未有? 家姐心即場畫張shopping list 再去supermarket 掃貨! 睇佢好認真咁去揾材料㗎!

27Apr
要整定野食啦！今晚同家姐心完成左cupcake, 菠蘿腸，啫喱糖，媽咪另外再整左醉雞亦，焗飯...

28Apr

大日子!

場地佈置: 

  

重金禮聘舅父仔客串CHESS FUN:

魔術師哥哥同遊戲姐姐:





大合照:

總結:
辛苦，但值得。
而家家姐心講起自己5歲生日會，會話,"原來攪一個生日會都唔係咁易!" 見佢著緊個過程，好多時係佢提我要做野，"媽咪我地不如錄埋啲invitation比朋友仔?" "媽咪不如我地買啲士多啤梨整cupcake?""媽咪我地要同魔術哥哥講要咩公主啦！""媽咪會所哥哥話過兩日先比錢，而家過左兩日啦不如去比錢。""媽咪我地買左個公主放喺生日蛋糕上面未呀?"見到佢夜晚雖然攰/想玩/想睇卡通片，但講到要完成生日會呢個任務，家姐心都十分積極! 到生日會當日，佢好proud咁同人講邊啲野係佢自己有份攪。希望佢明白，所有野都要付出，但亦因為有付出，先會珍惜。

後記:
話說生日會完左，家姐心已經諗定下年生日會要點攪。我同佢講左句，"攪生日會好辛苦㗎喎! 又要洗好多錢..." 跟住佢話:"唔怕媽咪，我地下年喺屋企攪咪會無咁辛苦同平啲囉！"
阿女你真係咁覺得?!