熱到爆之再戰清新地

難得心意媽媽請到假, 當然同放緊暑假嘅家姐心周圍玩。今日 約埋朋友一齊重遊白水碗清新地。呢度假期好鬼full, 平日去會容易D book到。

補幾張上次啲相先:

今日一早十點出發去到西貢白沙灣碼頭搭多20分鐘船就會去到目的地。

如果唔想搭船, 可以搭車去到科技大學樂再行大概15至20分鐘嘅樓梯落山就會去到。但成三十幾度嘅天氣>_<，搭船似乎都係一個比較好啲嘅選擇。一落到船就有清新地嘅 叔叔接我哋。轉頭行上去係五分鐘嘅路程， 途中經過全場唯一一個廁所，當然要幫襯下。廁所算係好乾淨，大人小朋友都去得好放心。之後我哋行上去主要活動室(係開放式但有蓋類似canteen 嘅setting) 等待工作人員安排我哋做第一個活動 <有機耕作導賞>。今次大隊係一個暑期工哥哥，見佢黑黑瘦瘦嘅身型知道佢伙係清新地應該好努力工作。
雖然烈日當空,但係呢位義工哥哥一啲都 唔馬虎全程講足25分鐘。由一開始嘅鼠尾草/香茅, 到之後嘅扁豆/茄瓜/粟米都好詳細咁一一講解。

講解完咗之後就到<盆栽種植>，今次我哋要做嘅係薄荷草。小朋友喺附近薄荷草嘅種植地摘咗一小棵薄荷草過嚟之後，就用一個小花盆裝咗啲泥，然後將搣出嚟嘅薄荷草移植過去之後再加水。雖然工序簡單，但家姐心都玩得非常投入，做不停叮囑我每日返到屋企要一齊淋水^^。

整完盆栽之後，大家都有啲肚餓啦。不過根據上次經驗，我哋今次冇再做到個鬆餅或者pizza 又或者係壽司，因為呢啲嘢我哋喺屋企都會自己做。 所以今次我哋轉戰< 自製日式冷麵> 。營地一開始幫我哋安排好麵團，小朋友一去到已經可以開始製作。首先要出盡力將麵糰咁扁，然後碌扁佢。之後用麵條機將佢壓成一塊，搽啲麵粉之後放多次入面條機將佢整成麵條。整完麵條之後工作人員會幫我哋將麵條煮熟，小朋友就可以根據自己嘅喜好加雞蛋粟米/ 蟹柳/ 芝麻醬。當然，唔係第一次去嘅我哋已經準備咗自家製雞翼用嚟加餸。你睇家姐心食得幾開心!

開完餐之後，家姐心同朋友們開始周圍玩。本身話曬到好攰想休息嘅佢哋見到滑梯千秋，就忽然間變得一啲都唔怕曬咁衝咗出去，仲玩到忘曬形。

至於我同另一個媽咪就當然係留喺樹陰底下傾偈，望住佢哋自由放電啦。大戰咗300個回合之後，家姐心同朋友終於都頂唔住，我哋搭咗三點半嘅船返白沙灣。

雖然全日曬到燶，但問返家姐心佢都話玩得非常高興，仲成日叫我買個麵條機返屋企自己整麵食。本身我都有啲後悔冇帶細佬意過嚟，但係諗深一層，見到曬成咁， 一個一歲多少少嘅小朋友都係驚佢曬到發燒。。。唔緊要，清新地~ 涼啲嘅時候我哋會再見嘅，到時就帶埋細佬一齊嚟玩啦!

如果大家睇完有任何意見/問題都可以留言交流下。