心意一家大作戰

我婆婆煮嘢食好叻。 記得細細個已經食好多佢嘅撚手小菜，其中一樣印象最深就係端午節嘅粽。每一年我婆婆喺端午節前一個月，屋企都會好似工場咁樣，包好多粽送比人。 婆婆過咗身之後，總係覺得喺街食嘅粽爭咁啲嘢... 今年嘅端午節前兩三個禮拜，我就有少少手痕。既然釀苦瓜釀豆腐我都整到七八成嘅味道，不如試下整粽? 於是乎上網搵咗一啲recipe，再去街市請教賣糉葉嘅姨姨，就膽粗粗試下自己包粽! （20隻中小型粽份量） 材料: 糭葉 70片 糯米 2斤 去皮綠豆 1斤 餡料: 五花腩（切粒）1斤半 （肥瘦隨個人喜好，但肥啲香啲） 10隻現成鹹蛋黃（切半變20隻） 五花腩醃料 （要醃過夜x2）: 五香粉 半包（街市有賣細包裝） 鹽 2茶匙 生抽 1茶匙 糖 ½茶匙 胡椒粉 少許 紹酒 少許 糯米調味料: 鹽 1湯匙 糖 2 茶匙 綠豆調味料: 鹽 2茶匙 糖 1茶匙 油 1茶匙 做法: 五花腩切粒，加醃料，放雪櫃兩晚。 糯米和綠豆分別用清水沖洗乾淨後，加水浸過面。去皮綠豆浸一夜，糯米浸一小時後，瀝乾水分，用調味料拌勻。 糭葉用水泡浸過夜，再用水洗乾淨。放入一大鍋用滾水浸過頭，下1湯匙油。大火煮滾後熄火，焗一夜。（呢步唔可以skip因為咁樣糭葉先會柔軟，包嘅時候無咁容易折斷） 包粽方法：無可能講得明，自己睇片 最後我將包好嘅粽放入平時用嚟煲湯嘅電煲度煲 3小時，攪掂! 出嚟嘅效果其實都唔錯，對我嚟講最難拿捏就係糯米同綠豆嘅比例，仲有就係舊五花腩要幾肥先夠好食?! 覺得自己包嘅粽，好處係味道食材可以自己控制，起碼我冇落味精或者一啲不知名嘅材料，小朋友食都比較安心。除咗味道同材料之外，過程都好緊要，今年我係小試牛刀，所以所有野都自己一手一腳，等到下年端午節前夕應該可以搵家姐心一齊去經歷成個過程，由買野到幫手包，咁到時呢個就係一個好好嘅親子活動，令佢知道多啲傳統節日同食物之餘，更明白家嘅感覺!

我諗好多人都好似我咁，細細個嘅時候唔鍾意食苦瓜。但隨住人慢慢大個，就越來越鍾意食。 我婆婆係客家人 。客家人好鍾意釀嘢，釀豆腐釀鯪魚釀腐卷釀蛋釀苦瓜樣樣都精，所以我就由細食到大。云云釀菜之中，苦瓜應該都係排包尾。但人越大，甚至之後婆婆過身，就越想念呢種味道，所以喺同阿姨舅父嘅家庭聚會，我都會整下釀苦瓜（有時加埋釀豆腐），大家都好懷念一家人圍喺張枱食住婆婆親手整嘅餸。我整嘅當然不及婆婆，但作為家常小菜亦尚算合格。 以下係釀苦瓜嘅食譜，其實釀嘢嘅好處係食材種類同比例嘅自由度好大，隨時可以試新配搭，以下for 大家reference: 苦瓜 x 3 條（要揀長條型），切件（每件大概1.5cm 闊）去心。放入大滾水（加鹽1湯匙）煮1分鐘， 撈起備用。 餡料: 半肥瘦豬肉 x 1斤 （偏肥好食啲） 鯪魚肉 x 4 兩 （魚檔已攪好嗰啲） 馬蹄 x 5粒 調味: 糖 x 1 湯匙 雞粉 x 1湯匙 生粉 x 1 湯匙 生抽 x 1湯匙 將馬蹄去皮切粒，然後所有餡料同調味攪拌，再釀入苦瓜件。 開鑊加油，用中火將釀好苦瓜多餡一面向下煎香，反轉再煎香，加入1湯匙蒜蓉豆豉醬同大半碗水， 冚蓋焗十分鐘，食得! 想再好味啲等過夜第二日再食。

好耐冇返過去自己細個住嘅地方，今日約埋公公婆同舅父仔同我地一家四口去返以前住嘅地方- 樂華邨。 去商場食完飯(雖然以前食開嘅鋪頭已經無做，但居然喺同一個地點新開嘅食店見番以前做樓面個姐姐)，我哋去咗一啲以前細個成日去嘅舊式屋邨舖頭，雖然有好多都變咗，但係仲有幾間老字號，真係會忍唔住幫襯下佢哋。 去完商場睇舊舖頭之後，就去屋邨以前嘅單車徑。聽講上一手之前捱唔住執咗，但係我哋去嗰日咁啱新嘅一檔開幕，所以好好彩可以租到一架家庭單車(重要新張優惠20蚊一個鐘頭)。一家人輪住踩輪住玩，好快就玩左個幾鐘。 話說我哋今日其實都準備咗個活動，就係攞番以前細個啲相出嚟，舊地重遊之餘仲要擺返當年嘅post 映相！ 呢個過程大人細路都非常過癮！ 呢個尋根之旅本身係畀一班大人懷緬過去，但係另一個領晤係，其實小朋友(想當年我哋都係) 唔一定要去啲好靚好貴嘅樂園，只要有呢個空間，有呢個自由度，一啲最簡單嘅設施已經可以令佢哋覺得好開心！ 大家都揾個週末同小朋友一齊尋根！