第一次扶老攜幼之旅-Bali

Bali 係我地有家姐心之後第一個一家大細嘅旅行，正確啲講， 呢個係一個扶老攜幼 (我阿爸阿媽細佬加老爺當然仲有我地一家三口)一共8個人嘅挑戰。太詳細嘅details 記唔晒，畢竟已經差不多三年 (生完記性尤其差)，所以講旅程重點- 住同玩。

Villa Seriska Satu Sanur

今次我地目的係想一家人一齊，但覺得住酒店感覺好疏離，所以經過反覆research 後就揀左呢度-Villa Seriska Satu Sanur. 我喺Hotels.com book 完之後好快就同屋主Nilesh 聯絡，因為呢個唔係普通嘅Trip，係一個Birthday Trip; 唔係一個人嘅生日，係4個! 話說我阿爸同我兩個細佬連我老公都係10月生日，所以今次呢個Trip 嘅意義十分重大。講番Villa Seriska，本身係一間獨立別墅連泳池，一共有四間房。屋裡面有個管家同3-4個工人可以煮飯同招呼人客，亦有一架10人van 可以另外比錢同屋主Book。為左唔想太辛苦嘅關係，我一早已經同Nilesh 安排好當晚晚餐同蛋糕 (因為第一日就係我老公生日正日)。

因為飛機有啲遲，我地去到Villa 時已經8點。雖然天已黑，但入到門嘅感覺好驚喜呀! 因為通常網上見到嘅酒店相同真實係有啲距離，但呢間係真人靚過上鏡!

由於有啲夜，肚已餓，好彩野食已經為我地準備好!

之後發生左一段小插曲，就係家姐心疑似啃骨! 佢喴到傻，我地嚇到傻，管家好熱心咁帶我地到就近診所，最後家姐心有驚無險，但感謝管家嘅即時反應。

無事之後，當然唔少得屋主Nilesh為我地準備嘅蛋糕:

第一晚大家都好累，第二日主要都係喺Villa 游水同去附行下Hea 下。成家人最多時間係喺個private pool:

Villa 嘅地點係喺大馬路同海灘中間，兩者都係within walking distance。往大馬路方向會有好多大大小小嘅餐廳，有超市，有類似銀行嘅找換店，都算幾方便。向海灘方向同樣會有好多沿海餐廳，而第二晚我地去左Villa 附近嘅沙灘上開餐:

除左喺Villa private pool 同附近hea 下之外，Villa 亦可以幫我地叫Massage，可以選擇喺房或者泳池邊按摩，都幾寫意。 

http://www.villaseriskabeachsanur.com/

Mara River Safari Lodge/ Bali Safari Marine Park 

本身無諗住搬地方住，但點都想去呢個Bali Safari Marine Park ，最後考慮(1) 來回車程，(2) 入場門票(住酒店包埋); 同(3) 酒店設施，喺行程尾二嗰日，我地搬去Mara River Safari Lodge，亦即係Bali Safari入面嘅酒店。

我地book 左最大嘅Tembo Family Room，三房一廳。全酒店只有一間，所以都幾Full。

去到係黃昏時間，第一時間又係去個泳池。呢個泳池嘅特別地方係你會一邊游水，一邊見到河馬，長頸鹿同斑馬!佢地唔係喺個籠入面，而係好開心咁喺度行嚟行去...淨係呢點都好值得去見識下。聽講有啲細房個露台係可以直接餵長頸鹿。

第二日起身酒店包左早餐，係一面望住獅子一面食:

之後就可以喺Safari 裡面玩，有Safari tour, 大象parade, bird show, tiger area, 仲有個冷氣theatre有各種動物參與嘅舞台劇:

Safari當日有啲趕因為要搭飛機，但我覺得呢個地方值得住一至兩晚，可以慢慢玩，慢慢睇。

http://balisafarimarinepark.com/home-id