心意一家大作戰

十月係一個好有意義嘅月份。結婚前，十月係我爸爸同兩個細佬嘅生日; 結婚後，更加係我老公同工人嘅生日。後來發現原來我大姨都係十月出世! 而我媽咪亦都係十一月頭生日，所以...就係好多人差唔多時間生日啦！ 咁多位十月之星，生日快樂!

今日去寶福山拜完祖先，順道同小朋友去沙田公園城門河附近放電。 行入公園未到城門河已經有一個唔錯嘅公園可以比家姐心同細佬意放下電。 玩左一陣家姐心已經急不及待去今日嘅戲玉- 踩單車! 原來租單車同踩單車嘅地方都非常方便，喺兒童遊樂場後面就係。我地一家四口同爺爺一共租左3架車- 三人家庭車，正常成人單車同家姐心嘅粉紅戰車(輔助輪單車)。我地只係租左一個鐘玩下，一共120蚊。 由於假期關係，人流都幾多，家庭車更加差不多無晒，結果我地租嗰架有啲ou ou 地。 出發啦！家姐心一個領先係咁踩，好彩輔助輪都踩唔到好快，如果唔係都幾難追...  大人單車正常，係我太耐無踩單車要練下 =='，到家庭車啦， 真係 好。難。踩! 爸爸踩左幾分鐘已經頂唔住! 呢個時候，救星出現啦！ 佢就係舅父仔! 梗係捉住個大隻仔幫手! 沿住城門河係咁踩，雖然人比較多但風景怡人，陣陣河風迎面吹嚟真係幾寫意! 呢度係一個好地方，下次星期六或者學校假期可以一家人再嚟!

中秋前夕，趁放假去元朗玩下。因為怕落雨嘅關係，行程以近地鐵站為首選。 環保農莊- 位於錦上路距離5分鐘步程，啱晒! 落左車A出口穿過停車場就見到指示，5分鐘內就行到。 入園先會經過一個燒烤場。再行入去就見到一系列嘅活動啦。入場免費，但每個活動付款。 家姐心第一件事就衝入去餵小動物- 每份飼料5蚊，都幾抵玩。由於我地係今日第一班入場餵動物嘅客人，啲小動物見到我地好興奮! 有兔仔，肥豬同羊咩～ 而呢隻豬，可以話係我地去咁多個農場當中最活潑嘅肥豬! 之後仲比我地發現可以入去裡面餵兔仔! 超好玩! 餵完小動物，家姐心想做手工，於是就買左呢份填色小玩意，有大有細，呢份只收20蚊!  填完拎去焗幾分鐘等佢凝固，就可以拎番屋企佈置。除左呢種小手工，仲有得玩彩沙樽，同一種有漸變色嘅彩瓶。 旁邊有war game 場，因為今次得我地一家，其他小朋友又大好多，所以我地只係喺隔離睇。但見到另外有一班小朋友就玩得好開心! 呢個game 40蚊15分鐘。 除左war game, 仲有個迷你車場比小朋友玩。 另外仲有啲小遊戲例如網金魚，釣環保魚，挖金，沙池等，全部都係大概20蚊玩十零分鐘。 成個場場仔細細，勝在玩嘅地方夠集中，爸爸媽媽唔駛咁辛苦，玩嘅項目都幾多。但就無草地比小朋友放電，不過唔緊要，小朋友總會揾到地方放電: 以交通方便度呢度都算無得輸，玩下玩下都可以玩3-4 個鐘。如果時間好充裕同天氣許可，可以去遠啲去錦田鄉村俱樂部。 另外同場加影大橋街市燈籠街:

如果我唔使返工嘅日子，久唔久都會包下水餃。我未嫁之前喺屋企，我媽都會時不時整水餃食，非常有家嘅感覺。而家我有自己嘅家庭，我都希望將呢一種家嘅感覺延續落去。 最高紀錄一個人一口氣包左300+餃子 包餃子第一件事就係買皮。餃子皮係白色圓形嘅，唔好攪錯雲吞皮 (黃黃地色有少少鹼水味)。有啲賣餃子皮嘅舖頭仲會有細分餃子皮嘅大細同厚薄嘅，鍾意邊種都係因人而異。厚身啲口感好啲，薄啲就無咁漏。 所以買嘅時候要問清楚究竟一斤有大概幾多隻，如果唔係都好難預份量。 餡料方面我自己鍾意食韭菜多啲，但小朋友就鍾意食粟米。菜同肉嘅比例我自己鍾意計大概1比1，但包餃子其實自由度極大，想點玩都得,最緊要肯試! 最近特登淘左個"餃子神器"，作用主要係比小朋友試玩。今日終於開封! 今日我地包粟米餃。睇下家姐心包得幾認真! 坦白講如果自己識包一定係自己包得靚啲實淨啲，但如果同小朋友一齊玩，呢件神器都幫到手! 我都無諗過家姐心一口氣坐左45分鐘同我一齊包晒 :) 唔知幾時到細佬意一齊包呢？

我做手工真係唔叻...其實係十分配合我嘅人物性格- 咁心急嘅人係無可能做到靚手工。奈何當家姐心入左幼兒園之後，親子手工似乎係無可避免，大鑊嘅係家姐心喺呢方面都算係盡得我真傳...唔緊要，最多當同學仔拎住啲大師級嘅手工番學校嘅時候，我地拎番啲似係幼稚園級嘅番去啫...T.T.... 中秋節，帶個手製燈籠番學係基本吧！家姐心PN同K1嗰兩年我可以話係懶到不得了，求其拎個現成燈籠上要貼小小野就算... 到今年，我的起心肝，因為都係想透過整燈籠同家姐心講下中秋節嘅故事(嫦娥玉兔)同傳統(食月餅，玩燈籠等)，於是要早啲做功課準備下! 首先我係揾有無中秋親子燈籠班，但可能太簡單所以揾唔到... 跟住有同學仔媽媽幫手喺文具店買左一pack材料包諗住整金魚，但我玩左一輪唔好話家姐心，連我自己都攪唔掂.. 最後用左現代人嘅方法- 同家姐心一齊睇YouTube! 結果比我地揾到個相對簡單得嚟，家姐心又鍾意嘅造型- 玉兔! 集齊材料，個成品係堅我同家姐心合力完成，都只不過係15 分鐘! 真係請鼓掌! 後話: 想睇番中秋玩燈籠嘅由來，最後發現竟然係由越南傳番過嚟?! 今次真係長知識!

之前睇左陳美齡嘅自傳，好有興趣睇埋佢教佢三個囝囝嘅心得，所以去書局買埋佢呢本《50個教育子女方法》。 我唔係要家姐心同細佬意入史丹福，我只係見到陳美齡同佢三個囝囝嘅關係一直都好sweet，而更重要係，佢都係一個working mum! 仲要係一個工時一定比我長嘅working mum。究竟佢係點做到? 睇完呢本書可能會有啲啟發。 拎上手，呢本唔係一般厚典典嘅育兒理論，以我咁心急嘅性格，睇字典並唔係我杯茶。打開，每一個方法都係一個chapter，每一個chapter都只係3-4頁，裡面嘅內容有8成都係實例或者應用，適合我呢啲比較實際嘅媽媽! 以下我揀左5個印象特別深刻同可以即時應用嘅主題: 1) 家長承擔教育的全部責任 呢個chapter係比我自己嘅一個重要提醒。我有時會以工作為理由，將教育嘅責任比左學校，甚至上門補習嘅姐姐，但真心講，陳美齡做明星一定忙過我做銀行。即使我會揾學校或者姐姐幫手，但想點教始終要自己掌控住。再講，其他人點幫都只能教書本上嘅野，作為同小朋友最親近嘅人，身教先係最緊要。我記得有一次家姐心忽然講左一句"痴線"，我個心真係離一離，正想問一句"邊個教你講?" 但即刻諗起呢句咪就係我嘅口頭禪?!...嗰刻係後悔到想打自己一巴... 2) 有出頭的勇氣 而家喺香港呢個地方，當有人講出一啲與別不同或者同現有制度唔一樣嘅諗法時，都會畀人覺得係搞亂檔。但我覺得作者喺本書裏面講得好啱嘅係，只有與眾不同嘅思想先會令呢個社會進步，就係因為每日都有啲人諗啲新嘢出嚟，先會推動呢個世界向前。而我哋要訓練我哋嘅小朋友，就係令到佢地有獨立思考能力之餘，亦唔可以因為要人云亦云/怕其他人嘅眼光而埋沒自己嘅諗法。要做到呢樣其實係由細開始我哋要鼓勵佢地有信心去表達自己，製造一個令小朋友放膽開聲嘅氛圍。我會keep住提醒自己的! 3) 感恩 而家呢個社會嘅小朋友係好幸福嘅但好多時佢哋唔知，問題係，點樣先令佢地知?會唔會太細個? 作者建議早啲比小朋友做義工。我同意，但我覺得仲可以同佢地睇報紙/新聞。睇報紙/新聞我唔係可以日日同佢地做到，但慢慢試，效果係見到嘅。首先我會同家姐心解釋報紙係話比我地知呢個世界發生緊咩事，因為呢個世界好大。跟住揀啲簡單(而有圖片)嘅新聞，例如邊...