心意一家大作戰

我婆婆煮嘢食好叻。 記得細細個已經食好多佢嘅撚手小菜，其中一樣印象最深就係端午節嘅粽。每一年我婆婆喺端午節前一個月，屋企都會好似工場咁樣，包好多粽送比人。 婆婆過咗身之後，總係覺得喺街食嘅粽爭咁啲嘢... 今年嘅端午節前兩三個禮拜，我就有少少手痕。既然釀苦瓜釀豆腐我都整到七八成嘅味道，不如試下整粽? 於是乎上網搵咗一啲recipe，再去街市請教賣糉葉嘅姨姨，就膽粗粗試下自己包粽! （20隻中小型粽份量） 材料: 糭葉 70片 糯米 2斤 去皮綠豆 1斤 餡料: 五花腩（切粒）1斤半 （肥瘦隨個人喜好，但肥啲香啲） 10隻現成鹹蛋黃（切半變20隻） 五花腩醃料 （要醃過夜x2）: 五香粉 半包（街市有賣細包裝） 鹽 2茶匙 生抽 1茶匙 糖 ½茶匙 胡椒粉 少許 紹酒 少許 糯米調味料: 鹽 1湯匙 糖 2 茶匙 綠豆調味料: 鹽 2茶匙 糖 1茶匙 油 1茶匙 做法: 五花腩切粒，加醃料，放雪櫃兩晚。 糯米和綠豆分別用清水沖洗乾淨後，加水浸過面。去皮綠豆浸一夜，糯米浸一小時後，瀝乾水分，用調味料拌勻。 糭葉用水泡浸過夜，再用水洗乾淨。放入一大鍋用滾水浸過頭，下1湯匙油。大火煮滾後熄火，焗一夜。（呢步唔可以skip因為咁樣糭葉先會柔軟，包嘅時候無咁容易折斷） 包粽方法：無可能講得明，自己睇片 最後我將包好嘅粽放入平時用嚟煲湯嘅電煲度煲 3小時，攪掂! 出嚟嘅效果其實都唔錯，對我嚟講最難拿捏就係糯米同綠豆嘅比例，仲有就係舊五花腩要幾肥先夠好食?! 覺得自己包嘅粽，好處係味道食材可以自己控制，起碼我冇落味精或者一啲不知名嘅材料，小朋友食都比較安心。除咗味道同材料之外，過程都好緊要，今年我係小試牛刀，所以所有野都自己一手一腳，等到下年端午節前夕應該可以搵家姐心一齊去經歷成個過程，由買野到幫手包，咁到時呢個就係一個好好嘅親子活動，令佢知道多啲傳統節日同食物之餘，更明白家嘅感覺!

我諗好多人都好似我咁，細細個嘅時候唔鍾意食苦瓜。但隨住人慢慢大個，就越來越鍾意食。 我婆婆係客家人 。客家人好鍾意釀嘢，釀豆腐釀鯪魚釀腐卷釀蛋釀苦瓜樣樣都精，所以我就由細食到大。云云釀菜之中，苦瓜應該都係排包尾。但人越大，甚至之後婆婆過身，就越想念呢種味道，所以喺同阿姨舅父嘅家庭聚會，我都會整下釀苦瓜（有時加埋釀豆腐），大家都好懷念一家人圍喺張枱食住婆婆親手整嘅餸。我整嘅當然不及婆婆，但作為家常小菜亦尚算合格。 以下係釀苦瓜嘅食譜，其實釀嘢嘅好處係食材種類同比例嘅自由度好大，隨時可以試新配搭，以下for 大家reference: 苦瓜 x 3 條（要揀長條型），切件（每件大概1.5cm 闊）去心。放入大滾水（加鹽1湯匙）煮1分鐘， 撈起備用。 餡料: 半肥瘦豬肉 x 1斤 （偏肥好食啲） 鯪魚肉 x 4 兩 （魚檔已攪好嗰啲） 馬蹄 x 5粒 調味: 糖 x 1 湯匙 雞粉 x 1湯匙 生粉 x 1 湯匙 生抽 x 1湯匙 將馬蹄去皮切粒，然後所有餡料同調味攪拌，再釀入苦瓜件。 開鑊加油，用中火將釀好苦瓜多餡一面向下煎香，反轉再煎香，加入1湯匙蒜蓉豆豉醬同大半碗水， 冚蓋焗十分鐘，食得! 想再好味啲等過夜第二日再食。

好耐冇返過去自己細個住嘅地方，今日約埋公公婆同舅父仔同我地一家四口去返以前住嘅地方- 樂華邨。 去商場食完飯(雖然以前食開嘅鋪頭已經無做，但居然喺同一個地點新開嘅食店見番以前做樓面個姐姐)，我哋去咗一啲以前細個成日去嘅舊式屋邨舖頭，雖然有好多都變咗，但係仲有幾間老字號，真係會忍唔住幫襯下佢哋。 去完商場睇舊舖頭之後，就去屋邨以前嘅單車徑。聽講上一手之前捱唔住執咗，但係我哋去嗰日咁啱新嘅一檔開幕，所以好好彩可以租到一架家庭單車(重要新張優惠20蚊一個鐘頭)。一家人輪住踩輪住玩，好快就玩左個幾鐘。 話說我哋今日其實都準備咗個活動，就係攞番以前細個啲相出嚟，舊地重遊之餘仲要擺返當年嘅post 映相！ 呢個過程大人細路都非常過癮！ 呢個尋根之旅本身係畀一班大人懷緬過去，但係另一個領晤係，其實小朋友(想當年我哋都係) 唔一定要去啲好靚好貴嘅樂園，只要有呢個空間，有呢個自由度，一啲最簡單嘅設施已經可以令佢哋覺得好開心！ 大家都揾個週末同小朋友一齊尋根！

嚟到從宿營嘅第二日，其實時間唔係好多，因為十一點半前就要交鎖匙。我哋八點零鐘起身梳洗之後，就去番山腳嘅餐廳食早餐。本來想同家姐心去旁邊嘅馬術學校睇下馬 ( 鯉魚門渡假村最特別嘅地方就係有一間騎術學校喺個canteen旁邊，但最起碼要6歲以上先有得騎），但咁啱原來嗰日係休息日所以無得入去。 食完早餐之後，我地行番上山腰位置，因為家姐心都係非常念念不忘個繩網，所以趁仲早唔太曬嘅時間，我哋又去咗成網玩咗一輪。 玩完經過手工藝室又心思思入去八卦下，跟住我哋就整咗一對母女裝嘅手繩(非常浪漫!）。本身想去隔離玩埋室內攀山但無開放。 之後我哋都上左去主要活動大樓第二第三層揾野玩。 上到去有好多唔同嘅活動例如射箭，草地滾球，康樂棋等活動，但對一個四歲嘅小朋友嚟講，都唔算太適合，所以我哋望下就返落去。 話咁快時間差唔多啦，所以我哋要返上去間房度執嘢交鎖匙。整個過程非常順利，家姐心都自動自覺幫手，最後仲自己將個行李拉番落山。 交完鎖匙之後趁有少少時間，就同家姐心踩咗陣單車。 不過嗰陣已經有啲曬，踩咗兩三個字已經頂唔順。最後我哋就等免費shuttle bus 去柴灣,再轉車返屋企。 如果去宿營嘅朋友我會建議book埋之後嘅日營。因為宿營嘅活動時間到11點就會完，但12點先食飯，book左日營就可以填補埋呢個空檔。如果小朋友仲有一兩個欲罷不能嘅活動仲可以食完飯再玩埋，之後先輕輕鬆鬆搭shuttle bus離開。 總結返兩日一夜嘅活動，其實好難得同個女可以二人世界足24小時。因為平日又番工又有工人，好多時都會分薄咗啲時間同專注力。所以有機會都會再試下! 費用方便，其實兩日一夜嘅宿營嘅人頭費只不過係幾十蚊港紙(週末會貴少少但都唔過百蚊），小朋友仲有半價。另外每一餐飯就大概係20蚊(人頭計）。如果之前唔訂餐到時先買會貴少少。 而日營價錢更平30蚊有交易，所以政府呢啲嘅渡假中心其實係好抵玩。 再提一提，記得帶足夠蚊怕水，如果唔係就好似心家姐咁... 我哋八月會試下麥理浩夫人度假村。今次我會擴大規模- 一個扶老攜幼嘅宿營，一行11人! 到時再post!

Day 1 因為平日要返工嘅關係，成日都覺得同小朋友少咗啲親子時間。所以趁住復活節可以攞到兩日annual leave 就試下book咗鯉魚門渡假村兩日一夜宿營。相信去過鯉魚門渡假村嘅朋友都知道，鯉魚門渡假村嘅地勢係有小小陡峭嘅。住宿嘅地方喺山頂，如果要活動呢係要落去山腰或山腳，到食飯/騎馬係要落去另一邊山腳。所以去呢個渡假營玩都對體力有一定要求。由於淨係得我一個放假嘅關係，所以今次淨係同家姐心一個去住先，下次再同細佬意去。以下係家姐心出發前嘅準備圖... 17號嘅晏晝，一個風和日麗嘅日子，我哋同埋家姐心嘅一個同學同埋佢媽咪一齊出發去鯉魚門渡假村。 我地大概兩點零鐘到達村口。我地首先拎左鎖匙，擺低我哋嘅行李上去位於山頂嘅房間之後，終於可以落山進行我哋第一個活動-兒童繩網。 家姐心同同學仔好似馬騮咁玩完一輪之後，就頂唔順頂轉去左旁邊一個比較靜態少少嘅活動-做手工。做手工嘅活動室喺主要活動大樓地下嘅冷氣房，每節時段大概20分鐘左右，會有個工作人員會教小朋友做啲簡單嘅手工。我哋當日做嘅係蝴蝶。 做完手工之後一小朋友就蠢蠢欲動想再活動下。 但由於烈日當空嘅關係，我哋就去咗隔離嘅室內舞蹈室同老師一齊跳舞。咁但係，呢度導師主要係教一啲類似大媽舞嘅風 格嘅，所以小朋友都未必識欣賞。 好彩今次都冇其他人喺個舞蹈室裏面，所以導師都由得佢地播住學校啲歌自己有自己跳，跳得好開心。 跳完舞一出去戶外，就見到我地嘅童年回憶- 跳飛機！所以我呢個貪玩嘅媽咪當然捉住佢兩個小朋友一齊跳。 跳完一輪，我地就轉戰位於舊咖啡閣對出嘅一個遊樂場。呢個遊樂場就同我哋一般係屋企附近見到嗰啲差唔多樣，但係因為有兩個小朋友一齊玩嘅關係，淨係你追我逐，瀡下滑梯都覺得非常之高興。 上上落落玩咗一輪之後，差唔多6點夠鐘食飯啦 ！所以我哋就慢慢碌番落去山腳嘅飯堂準備食晚餐。至於度假村嘅嘢食啦喎...叫做食飽肚痛就算啦... 匆匆食完飯之後，兩個小朋友當然係意猶未盡繼續玩！但由於天開始黑，怕餵蚊，於是我哋就再由山腳行返上去山腰，去到主要活動大樓對面有一個兒童嘅室內遊戲屋。 呢座遊戲屋呢係由三間房組成，兩間細少少嘅房有大量煮飯仔用品同積木，大房裡面有滑梯同其他大件啲積木。連埋其...

去清邁嘅原因，係因為大概三四個月前同同事去過呢度，覺得呢個地方好適合family trip，所以返到屋企之後就拿拿聲book機票，準備再一次嘅十月之旅。就喺我book晒啲機票之後，就發現自己又中獎! 細佬意is on the way! 所以今次呢個真係扶老攜幼(連埋肚裏面嗰個)一齊去旅行! Oriental Siam Resort ( http://www.orientalsiamresort.net/index.html) 由於一行9人，同上一次去Bali 一樣，都係想揀一啲容納到所有人兼有個common area可以傾下偈享受下家庭樂嘅地方。經過一番嘅research之後，今次我哋就揀咗呢間近市郊嘅Oriental Siam。 Oriental Siam 係一個家庭式經營嘅小型resort，一共只有七八間房，其中四間係喺同一棟Villa，而Villa嘅上層就有個common area 連大露台，可以比住客喺露台梳化上面傾偈。 我地就係租左呢棟villa，泰式設計房間，擺設傢具都幾新淨。間屋前面就係泳池，距離猶如Private pool，所以都好寫意。 美中不足係個泳池啲水略嫌消毒味較濃，所以我地都只係游左一兩次短時間。 Resort雖小，但早餐超正，所有野即叫即整之餘亦十分好味! 不過要預番多啲時間比佢地慢慢整: Night Street Food Tour ( http://www.chiangmaistreetfoodtours.com/) 喺香港自己都係鍾意"掃街"嘅人，今次嚟清邁，又比我揾到啲類似嘅地道嘢。 出發之前我已經聯絡好導遊Tom，到埗第一夜地安排好車由酒店接我地。當晚Tom除左帶我哋去睇咗同試咗好多地道嘅嘢食之外，佢亦非常細心地準備咗一個List- 一個有印尼文(連讀音)同埋英文意思嘅list，上面有好多印尼嘅地道嘢食。Tom 話如果今晚試完啲野之又想試的話就可以帶住呢個紙去order 啦! 老實講如果唔係Tom 我地自己都唔敢去試呢啲街邊小食，雖然味道方面未必個個會鍾意 (可能太地道 haha)，but it's good to have a try! Elephant...