心意一家大作戰

大熱天時有乜好得過去一個地方，大人有得坐喺冷氣房，食住嘢，小朋友又有得玩?  今次去咗元朗唐人新村路嘅Tong's。上次復活節試過一次，覺得佢嘢食都唔錯，小朋友都玩得開心，更重要係佢嘅活動時間由上午11點去到下晝四點，慢慢坐慢慢食慢慢玩。補幾張上次啲相先: 佢逢星期日仲有攤位遊戲，同埋live band坐陣 。而小朋友除咗可以玩佢嘅有蓋遊樂場之外，仲可以有得做手工，油顏色，cooking class，可以話一次過滿足曬幾個願望。 趁呢排暑假佢哋搞咗個海盜主題嘅自助餐，所以又約埋家姐心嘅同學仔兩家人一行十個去幫襯。我哋book咗十一點鐘，留咗圓枱。因為相對比較闊落，擺到兩架bb車。一去到，家姐心同同學仔已經去咗玩遊樂場裏面嘅千秋同埋粉筆畫畫。大人 當然就輪流睇小朋友同食嘢。 先講嘢食頭盤方面有 parma ham， 煙三文魚，凍蝦，凍螺，日式冷烏冬，沙律 等都好新鮮；熱盤除左 一般啲魚肉菜之外仲有 燒牛肉，海鮮bbq ，燒菠蘿粟米，天婦羅，pizza即炒意粉等；另外仲有甜品部:有新鮮水果，dreyer's雪糕 ，bread pudding， 六七種唔同口味嘅蛋糕 ，朱古力火鍋 ，啫喱糖等。每樣食一件都一定飽到攬住個肚。 而小朋友們都係先玩一輪再過嚟食嘢，不過食咗冇耐又走咗去油顏色做手工。 返到埋位又有扭氣球嘅叔叔，緊接住仲有cooking class。  雖然係整好簡單嘅沙律，但係都整得好開心。休息冇一陣，出面又有水槍大戰，玩完水槍又送多份小手工。做埋個小手工，望下個鐘，已經三點幾。大家就懷著非常滿足嘅心情同非常疲倦嘅軀殼返屋企啦。

一路都好想同家姐心試下做義工，所以當我見到bb醫生有一個大概一個鐘頭嘅老人中心探訪嘅時候，我就第一時間揾埋家姐心嘅同學仔一齊報咗名。成件事好簡單，只需簡單資料登記做會員就可以報名。 http://www.doctorbb.org.hk/ 每一次報名需要捐款120蚊。小朋友淨係需要準備一個一分鐘內嘅自我介紹 同埋表演。 今日我哋去嘅地方係大圍一間老人院。我哋首先喺大圍港鐵站集合，之後一齊行去老人院 。去到嘅時候其實一班老人家已經喺活動室準備好， 坐定定等住同小朋友玩。熱帶隊嘅vicky姐姐亦都非常之有經驗，去到嘅時候就先等小朋友輕輕熟習咗環境，等小朋友自由同唔同嘅老人家打招呼。 安頓好之後，至請一班小朋友喺最前排坐好，然後就逐一介紹小朋友出嚟做自我介紹同埋表演。小朋友嘅年齡係闊嘅，因為呢個bb醫生係歡迎六個月大嘅bb去到六歲嘅小朋友去參與呢類型活動。 例如今日下午呢班小朋友係由兩歲去到五歲。有一啲小朋友會比較外向啲，工作人員嗌佢個名嘅時候會好興奮，完全唔需要daddy媽咪嘅陪伴就已經衝咗出去，非常之勇敢 。令人印象最深刻嘅係一個五歲嘅小朋友行咗出去之後用小提琴拉咗隻twinkle twinkle little star 令到大家都拍爛手掌。當然呢次係家姐心第一次出動，以我熟悉嘅佢只要佢肯出到去講咗自己個名我已經覺得超額完成。到vicky姐姐嗌佢個名嘅時候，我同佢一齊行出去，最後佢都可以簡單自我介紹咗同講左句祝大家開開心心。雖然冇唱到原本練咗嘅歌但係我都覺得佢跨出咗心理關口。 當大概十零個小朋友出嚟 完佢哋嘅介紹或者係表演之後，Vicky姐姐就拎咗一疊貼紙出嚟。 呢個都係一個非常之好嘅主意，令到小朋友肯同老人家互動，因為小朋友都真係好鍾意貼紙。佢哋嘅任務呢就係將佢哋手上嘅貼紙送畀唔同嘅老人家。當然 daddy媽咪 一齊去嘅時候呢都會叫佢哋同啲老人家握下手傾下計，問下佢幾多歲呀咁樣。咁老人家呢見到啲小朋友亦都非常之就開心，最後有老人家張貼紙貼到手袋同 塊面都有。喺呢個時候，小朋友其實都玩得幾high。 跟住 vicky姐姐呢就叫咗一班小朋友企曬出嚟進行大合唱。唱咗好 幾隻小朋友嘅首本名曲例如太陽伯伯 abc song, twinkle twinkle little star 等，最後連生日歌...

難得心意媽媽請到假, 當然同放緊暑假嘅家姐心周圍玩。今日 約埋朋友一齊重遊白水碗清新地。呢度假期好鬼full, 平日去會容易D book到。 補幾張上次啲相先: 今日一早十點出發去到西貢白沙灣碼頭搭多20分鐘船就會去到目的地。 如果唔想搭船, 可以搭車去到科技大學樂再行大概15至20分鐘嘅樓梯落山就會去到。但成三十幾度嘅天氣>_<，搭船似乎都係一個比較好啲嘅選擇。一落到船就有清新地嘅 叔叔接我哋。轉頭行上去係五分鐘嘅路程， 途中經過全場唯一一個廁所，當然要幫襯下。廁所算係好乾淨，大人小朋友都去得好放心。之後我哋行上去主要活動室(係開放式但有蓋類似canteen 嘅setting) 等待工作人員安排我哋做第一個活動 <有機耕作導賞>。今次大隊係一個暑期工哥哥，見佢黑黑瘦瘦嘅身型知道佢伙係清新地應該好努力工作。 雖然烈日當空,但係呢位義工哥哥一啲都 唔馬虎全程講足25分鐘。由一開始嘅鼠尾草/香茅, 到之後嘅扁豆/茄瓜/粟米都好詳細咁一一講解。 講解完咗之後就到<盆栽種植>，今次我哋要做嘅係薄荷草。小朋友喺附近薄荷草嘅種植地摘咗一小棵薄荷草過嚟之後，就用一個小花盆裝咗啲泥，然後將搣出嚟嘅薄荷草移植過去之後再加水。雖然工序簡單，但家姐心都玩得非常投入，做不停叮囑我每日返到屋企要一齊淋水^^。 整完盆栽之後，大家都有啲肚餓啦。不過根據上次經驗，我哋今次冇再做到個鬆餅或者pizza 又或者係壽司，因為呢啲嘢我哋喺屋企都會自己做。 所以今次我哋轉戰< 自製日式冷麵> 。營地一開始幫我哋安排好麵團，小朋友一去到已經可以開始製作。首先要出盡力將麵糰咁扁，然後碌扁佢。之後用麵條機將佢壓成一塊，搽啲麵粉之後放多次入面條機將佢整成麵條。整完麵條之後工作人員會幫我哋將麵條煮熟，小朋友就可以根據自己嘅喜好加雞蛋粟米/ 蟹柳/ 芝麻醬。當然，唔係第一次去嘅我哋已經準備咗自家製雞翼用嚟加餸。你睇家姐心食得幾開心! 開完餐之後，家姐心同朋友們開始周圍玩。本身話曬到好攰想休息嘅佢哋見到滑梯千秋，就忽然間變得一啲都唔怕曬咁衝咗出去，仲玩到忘曬形。 至於我同另一個媽咪就當然係留喺樹陰底下傾偈，望住佢哋自由放電啦。大戰咗300...

2017年7月24日 雖然太空館裝修，但天象廳仍然開放嘅。趁住家姐心放暑假，一於同佢試下呢個 超震撼大銀幕 今次我哋揀咗《與星同源》。 本身冇乜做功課，淨係諗住套戲講下同星星有關嘅嘢，於是乎就同家姐心入咗去睇。 開始排隊入場嘅時候呢喺門口收到一 副3D眼鏡，我同家姐心都覺得異常興奮！ 入到去我哋係坐比較後嘅位置，所以之後睇起嚟都係比較舒服嘅。 套戲一開始嘅時候已經畀你感受到嗰種阿凡達級嘅3D。而成套戲都係主要以動畫形式表達原來我哋人類同星星原來係同一個根源。 跟住嘅內容呢就對小朋友嚟講有小小深，因為佢係講宇宙大爆炸， 太陽系同星球嘅形成。當然之後就會講到我哋住緊嘅地球點樣由 一粒宇宙嘅塵埃變成有水，有土壤，有單細胞生命。之後進化到比較複雜嘅生命體例如恐龍， 最後就係哺乳類動物嘅誕生。 整體而言我覺得成套戲對於一個四歲嘅小朋友係太深嘅，但係因為套戲其實個長度都只不過係二十零分鐘，如果純粹想畀佢感受下大銀幕睇3d電影嘅話，其實都係一個唔錯嘅選擇。加上如果係一啲好奇心重啲嘅小朋友的話，呢一套戲相信都會令到佢哋問好多問題。