自製PIZZA 好EASY
話說之前買咗部麵包機，成千幾蚊嘅機淨係攞嚟整麵包覺得有啲浪費，不如試下其他function！ 於是就得起心肝試下佢整薄餅呢個function。 以下呢一個麵包機薄餅麵團嘅recipe係panasonic麵包機本身跟咗嘅，效果好唔錯。 薄餅麵團食譜 高筋麵粉 280g 砂糖 15g 牛油 12g 奶粉 6g 鹽 5g 凍水 190ml 即溶酵母 2.8g 麵包機只係幫到你整pizza嗰個麵團。所以成件事嘅樂趣係同小朋友一齊攞咗個麵團出嚟之後，搓下捏下碌下，上面塗一層茄汁意粉醬，再喺上面隨意加上香腸/菠蘿/粟米/青椒/ 蟹柳等。如果大人食嘅我會建議加啲parma ham。芝士當然要係大量 ^^。我通常會落兩種芝士，mozzarella cheese (即係會起絲嗰啲）同parmesan cheese (芝士條上面嗰啲），個口感會更加豐富。之後將半製成品放入預熱200度焗爐焗15-20分鐘 (depends on 厚薄)就可以食㗎啦！ 真係一個超簡單嘅食譜，又可以親子一番！